Mother Dairy : मदर डेअरीकडून दूध विक्री दरात प्रति लिटर २ रुपयांची वाढ

milk price hike : मदर डेअरीकडून दुधाच्या विक्री दरात २ रुपयांची वाढ करण्याचा निर्णय जाहीर करण्यात आला आहे. परंतु खरेदी दर मात्र कायम ठेवण्यात आले आहेत. नवीन विक्री दर ३० एप्रिल २०२५ पासून लागू करण्यात आल्याचं मदर डेअरी प्रसिद्धी पत्रकात स्पष्ट केलं आहे. ही दरवाढ दिल्ली, उत्तर प्रदेश, हरियाणा आणि उत्तराखंड या राज्यांसाठी लागू करण्यात आली आहे. 

दूध खरेदी दरात वाढ झाल्याचा दावा कंपनीने केला आहे. कंपनी दिलेल्या स्पष्टीकरणानुसार, "दूध खरेदी दरात वाढ झाली आहे. त्यामुळे दुधाच्या विक्री दरात वाढ करण्याचा निर्णय घ्यावा लागला. मागील काही महिन्यात दूध खरेदीचा खर्च प्रति लिटर ४ ते ५ रुपयांपर्यंत वाढला आहे." असंही मदर डेअरीनं सांगितलं आहे. 

मदर डेअरीकडून विक्री दरवाढीमुळे शेतकऱ्यांच्या खरेदी दरात मात्र वाढ करण्यात आलेली नाही. या निर्णयामुळे ग्राहकांना प्रति लिटर २ रुपये अधिकचे मोजावे लागणार आहे. परंतु त्या तुलनेत खरेदी दरात वाढ न केल्याने शेतकऱ्यांना त्याचा फायदा मिळणार नाही, असं जाणकार सांगतात. 

वाढत्या उष्णतेमुळे दूध उत्पादक शेतकऱ्यांचा खर्च वाढला आहे. तसेच उत्पादनही घटलं आहे. त्यामुळे उत्पादन खर्च वसूल होत नाही, असं शेतकरी सांगतात. त्यामुळे या लीन सीझनमध्ये दूध खरेदीचे दर वाढण्याची अपेक्षा शेतकऱ्यांना होती. परंतु कंपन्यांकडून दूध विक्री दरात वाढ केली जात आहे. यापूर्वी मदर डेअरीकडून दुधाच्या खरेदी दरात वाढ करण्यात आली आहे. परंतु खरेदी दर मात्र जैसे थे ठेवण्यात आले आहेत. 

नवीन दर काय? 

फुल क्रीम दूध (५०० मि.ली.) ३४ रुपयांवरून ३५ रुपये 

टोन्ड दूध (५०० मि.ली.): २८ वरून २९ रुपये

महाराष्ट्रातही सध्या वाढत्या उष्णतेमुळे दूध उत्पादनात घट झाली आहे. तसेच पशुखाद्याचे दरही वाढले आहेत. परंतु दूध खरेदीच्या दरात मात्र वाढ करण्यात आलेली नाही. मागील पाच ते सहा वर्षांपासून दूध उत्पादकांची आर्थिक कोंडी झालेली आहे.

दरम्यान, उत्तम प्रतीचं दूध ग्राहकांपर्यंत पोहोचवण्याची व शेतकऱ्यांचं  जीवनमान टिकवण्याची आमची वचनबद्धता कायम असल्याचा दावा मदर डेअरीनं केला आहे. तसेच ही दरवाढ म्हणजे वाढलेल्या खर्चाचा केवळ अंशतः परिणाम असून, शेतकरी आणि ग्राहक दोघांच्याही हिताची काळजी घेतली आहे, असंही कंपनी सांगितलं आहे.