Moringa Vegetable : शेवग्याच्या शेंगांची घरगुती बजेटला मदत

Vikramgad News : ग्रामीण भागात प्रत्येक घरासमोर एक ते दोन शेवग्याची झाडे लावलेली असतात. डिसेंबर-जानेवारीमध्ये या गावठी शेवग्याच्या झाडाला शेंगा लागतात. या शेंगांमुळे ग्रामीण भागातील गृहिणींची भाजीची चिंता मिटण्यास मदत होते. तसेच महिला या शेंगा विक्रीसाठी रस्त्याशेजारी बसलेल्या असतात.

डिसेंबर ते जानेवारी या थंडीच्या दिवसांमध्ये ग्रामीण भागात शेवग्याला मोठ्या प्रमाणात शेंगा लागतात. त्यामुळे या दोन महिन्यांत ग्रामीण भागात गृहिणींचे बजेट बसवण्यात या शेवग्याच्या शेंगांचा मोठा वाटा असतो. त्याचबरोबर या महिन्यात शेतावर असलेल्या किंवा अंगणात लावलेल्या वरव्याला (घेवडा) देखील शेंगा लागतात. त्यामुळे महिलांना बाजारातून भाजीपाला विकत आणण्याची वेळ सहसा येत नाही. त्यामुळे ग्रामीण भागातील महिलांची मोठी बचत या दोन महिन्यांत होते.

हा भाजीपाला नैसर्गिक असतो. त्याच्यावर कोणत्याही प्रकारच्या रासायनिक औषधांची फवारणी केली जात नाही. त्याचबरोबर यासाठी कोणत्याही प्रकारची खते वापरली जात नसल्याने त्याचा कोणताही दुष्परिणाम भाजीपाला खाणाऱ्याच्या आरोग्यावर होत नाही.

पानांची, फुलांचीही भाजी

शेवग्याच्या शेंगा आरोग्यवर्धक आणि स्वादिष्ट असतात. त्याचबरोबर भाजी, कडधान्य, वरण, सुक्‍या आणि ओल्या मासळीच्या कालवणात टाकल्यास जेवणाची चव वाढते. यंदा मात्र त्यांची आवक कमी आहे. शेवग्याच्या शेंगा भाजीत किंवा आमटीत टाकण्याची पद्धत आहे. शेवग्याच्या पानांची, फुलांचीही भाजी करून खाल्ली जाते. अनेक आजारांत शेवगा औषधांसारखा गुणकारी आहे.