Farmer Mobile Application: राज्यातील शेतकऱ्यांसाठी मोबाइल ॲप: शेतीसंबंधी योजनांची माहिती एका क्लिकवर!

Mumbai News: राज्यातील अल्प, अत्यल्प आणि बागायती शेतकऱ्यांना शेतीतील जोखीम कमी करण्यासाठी आणि विविध योजनांसह शेतीसंबंधीची सर्व माहिती मोबाइल ॲपवर देण्यासाठी तीन जलद कृती दलाची स्थापना करण्याचा निर्णय राज्य सरकारने घेतला आहे. या ॲपचा पहिला टप्पा १ एप्रिल, तर दुसरा टप्पा १ ते डिसेंबरदरम्यान सुरू होणार आहे.

राज्यात मोठ्या शेतकऱ्यांबरोबर अल्प आणि अत्यल्प भूधारक शेतकऱ्यांची संख्या मोठी आहे. या शेतकऱ्यांपर्यंत कृषी विद्यापीठांचे संशोधन, कृषी विभागाच्या योजना आणि सवलतींची माहिती पोहोचत नसते. त्यामुळे जानेवारी, २०२५ मध्ये एक खिडकी योजनेच्या धर्तीवर शेतकऱ्यांसाठी एकच मोबाइल ॲप तयार करण्यासाठी नानाजी देशमुख कृषी संजीवनी प्रकल्प संचालकांच्या अध्यक्षतेखाली समिती स्थापन करण्यात आली होती.

या समितीने आपला अहवाल राज्य सरकारला सादर केला आहे. या अहवालातील शिफारशींनुसार शेतकऱ्यांना शेतीतील जोखीम कमी करण्यासाठीची माहिती निरंतरपणे देण्याची गरज असल्याचे नमूद केले आहे

तीन टास्क फोर्समध्ये २२ अधिकारी

शेतकरी अॅप निर्मितीसाठी तीन टास्क फोर्समध्ये २२ अधिकाऱ्यांचा समावेश आहे. या टास्क फोर्समध्ये कृषी सहसंचालक विस्तार (२), स्मार्टचे अतिरिक्त प्रकल्प संचालक, नानाजी देशमुख कृषी संजीवनी प्रकल्पाचे कृषी विद्यावेत्ता, महात्मा फुले कृषी विद्यापीठ, वसंतराव नाईक मराठवाडा कृषी विद्यापीठ, डॉ. पंजाबराव देशमुख कृषी विद्यापीठ, डॉ. बाळासाहेब सावंत कोकण कृषी विद्यापीठांचे विस्तार व शिक्षण संचालक या टास्क फोर्सचे सदस्य आहेत.

ॲप तयार करण्यात कृषी विद्यापीठांचा महत्त्वाचा वाटा असल्याने राज्यातील वरिष्ठ अधिकाऱ्यांचा समन्वयासाठी कृती गट तयार करण्यात आला आहे. यामध्ये सहा अधिकाऱ्यांचा समावेश करण्यात आला आहे. टास्क फोर्सने जमा केलेल्या तांत्रिक माहिती पडताळणी आणि वर्गीकरणासाठी नऊ अधिकाऱ्यांचा कृती गट तयार केला आहे.