Crop Damage Compensation : कालवा फुटीच्या नुकसानीबाबत जलसंपदामंत्र्यांकडून पुन्हा आश्‍वासन

Solapur News : दोन वर्षांपूर्वी जानेवारीमध्ये उजनीचा डावा कालवा फुटून पाटकूल आणि परिसरातील शेतकऱ्यांच्या झालेल्या नुकसानीचे पैसे द्यावेत, अशी मागणी मोहोळचे आमदार राजू खरे यांनी जिल्हा नियोजन मंडळाच्या बैठकीत केल्यानंतर येत्या आठ दिवसांत नुकसानग्रस्त शेतकऱ्यांना पैसे मिळतील, अशी ग्वाही जलसंपदामंत्री राधाकृष्ण विखे पाटील यांनी दिली आहे.

या आधीही या प्रकरणाचा पाठपुरावा झाला आहे, पण पुढे काहीच झाले नाही, पण आता पुन्हा एकदा आश्‍वासन मिळाल्याने नुकसानग्रस्त १५४ शेतकऱ्यांच्या नुकसान भरपाईचा प्रश्‍न मार्गी लागणार का, हा प्रश्‍न उपस्थित झाला आहे.

दोन वर्षांपूर्वी २९ जानेवारी २०२३ रोजी पाटकुल (ता. मोहोळ) हद्दीत साखळी क्रमांक ११२/६५० या ठिकाणी उजनीचा डावा कालवा अचानक फुटला. कालवा फुटल्याने शेतकऱ्यांचे कोट्यवधीचे नुकसान झाले. अनेक शेतकऱ्यांच्या जमिनी वाहून गेल्या. अनेकांच्या विहिरी, बोअर गाळाने भरली, ठिबक सिंचन इलेक्ट्रिक मोटारी वाहून गेल्या, तर एका शेतकऱ्याचे घर पडले.

त्याशिवाय द्राक्ष, डाळिंब आदींसह अन्य फळबागा व पिकेही वाहून गेली. त्यात शेतकऱ्यांचे मोठे आर्थिक नुकसान झाले. केवळ अर्ध्या तासाच्या कालावधीत होत्याचे नव्हते झाले, दरम्यान महसूल प्रशासनाने तलाठी, ग्रामसेवक, कृषी सहायक, सार्वजनिक बांधकाम विभागाचे अधिकारी यांनी तातडीने पंचनामे करून तहसीलदार यांना अहवाल सादर केला.

तहसीलदारांनी तो अहवाल जलसंपदा विभागाकडे पाठविला. घटना घडल्या नंतर अनेक आमदार, खासदार, विविध वरिष्ठ शासकीय अधिकारी, कारखान्यांचे अध्यक्ष यांनी भेटी देऊन नुकसान भरपाई मिळवून देण्याबाबत भरभरून आश्‍वासने दिली, मात्र पुढे काहीच झाले नाही, तब्बल दोन वर्षे हा प्रश्‍न रखडला होता.

दरम्यान, आमदार खरे यांनी नुकत्याच झालेल्या जिल्हा नियोजन मंडळाच्या बैठकीत या शेतकऱ्यांच्या नुकसान भरपाईबाबत आवाज उठविला, त्यामुळे जलसंपदामंत्री विखे-पाटील यांनी येत्या आठ दिवसांत पैसे देण्याची व्यवस्था करण्याचे आश्‍वासन दिले. त्यामुळे शेतकऱ्यांचे डोळे आता मदतीकडे लागले आहेत.