Livestock Market : लाखमोलाचे पशुधन बाजारात

Chhatrapati Sambhajinagar News : गतवर्षी कमी पाऊस झाल्याने परिसरात मोठ्या प्रमाणावर पाणीटंचाई जाणवत आहे. गावाबरोबरच शेतातही पाणी नसल्याने टंचाईने गंभीर रूप धारण केले आहे. केवळ पाण्याअभावी बैलांबरोबरच दुभती जनावरे सुद्धा बाजारात विक्रीसाठी येत असल्याने जनावरांच्या किमती जवळपास २० ते २५ टक्क्यांनी कमी झाल्या आहेत.

या भागा रब्बीची पेरणी शेतकऱ्यांनी कशीबशी केली होती. कारण, पिकांना देण्यासाठी पाणी नव्हते. पण, दिवाळीनंतर या भागात सलग पाच दिवसांत जवळपास १२० मिलिमीटरच्या आसपास अवकाळी पाऊस झाला. यामुळे विहिरींना थोड्याफार प्रमाणावर पाणी आले, तसेच तळ्यातही थोडेफार पाणी साचले. त्यामुळे दिवाळीतच निर्माण होणारी दुष्काळी परिस्थिती दोन-तीन महिने पुढे ढकलली.

गहू, ज्वारी, हरभरा यासारखी रब्बीची पिके सुद्धा चांगल्या प्रमाणात आली. ‘अवकाळी’मुळे ज्वारीच्या पेरणीमध्ये मोठ्या प्रमाणावर वाढ झाल्याने सर्वत्र ज्वारी चांगल्या प्रमाणात आली. जनावरांना चारा मुबलक प्रमाणात तयार झाला. पण, फेब्रुवारीच्या शेवटी या भागात भीषण पाणीटंचाई जाणू लागली. गावात टँकर सुरू झाले.

पण, शेतात जनावरांना पिण्यासाठी पाणी आणायचे कुठून, असा प्रश्न शेतकऱ्यांना पडला असल्याने अनेकांनी पशुधनांना बाजाराची वाट दाखवायला सुरवात केली आहे. मार्च महिन्याच्या शेवटी गुढीपाडव्याच्या आसपास बैलं बाजारात सुद्धा तेजी असते, अनेक शेतकरी उन्हाळी कामे व पेरणीसाठी आत्ताच बैल खरेदी करतात. पण, यावर्षी पाणीच नसल्याने बैल जोड्या खरेदी करणे सुद्धा शेतकऱ्यांनी टाळल्यामुळे जनावरांच्या किमतीत जवळपास २० ते २५ टक्के घट झाल्याचे दिसून येत असून, बाजारात मंदीचे सावट दिसून येत आहे.

अशा आहेत किमती

७० ते ९० हजारांच्यादरम्यान विकली जाणारी बैलं जोडी सध्या ५० हजार ते ७० हजारांच्या दरम्यान विकली जात आहे. तर ९० हजार रुपयांना विकली जाणारी गाय सध्या ७० हजार रुपयांना तर ७० हजारांची गाय ५० हजारांच्या आसपास विकली जात आहे.