Chhagan Bhujbal : मराठा-ओबीसी वादात मध्यस्थी करा

Mumbai News : बारामतीतील जाहीर सभेत शरद पवार यांच्यावर अप्रत्यक्ष टीका केल्यानंतर दुसऱ्याच दिवशी सोमवारी (ता.१५) अन्न व नागरी पुरवठामंत्री छगन भुजबळ यांनी पवार यांच्या निवासस्थानी भेट घेतली.

तब्बल दीड तास वाट पाहिल्यानंतर काही वेळ दोघांत राज्यात पेटलेल्या ओबीसी-मराठा संघर्षावर चर्चा झाली. राज्यात आरक्षणामुळे वातावरण दूषित आणि स्फोटक झाले असून त्यात आपण मध्यस्थी करावी, अशी विनंती केल्याचे भुजबळ यांनी भेटीनंतर पत्रकारांशी बोलताना सांगितले.

बारामती येथे राष्ट्रवादी काँग्रेसच्या अजित पवार गटाने रविवारी (ता. १४) जनसन्मान मेळावा आयोजित केला होता. या मेळाव्यात छगन भुजबळ यांनी शरद पवार यांच्यावर आरक्षणावरून जोरदार टीका केली होती.

सरकारने बोलविलेल्या सर्वपक्षीय बैठकीला जाऊ नका, असा फोन बारामतीहून गेल्याचे सांगत पवारांवर टीका केली होती. त्यानंतर २४ तास उलटण्याआधीच भेटीची वेळ न घेता अचानक पवार यांचे निवासस्थान असलेले सिल्व्हर ओक गाठले.

भुजबळ यांच्याआधी नवनिर्वाचित विधान परिषद आमदार मिलिंद नार्वेकर हे नुकतेच पवार यांची सदिच्छा भेट घेऊन बाहेर पडले होते. भुजबळ हे अचानक पवार यांच्या निवासस्थानी गेल्यानंतर तब्बल दीड तास ते प्रतीक्षा कक्षात वाट पाहत होते. अखेर त्यांची पवार यांच्याशी भेट झाल्यानंतर त्यांनी प्रसारमाध्यमांच्या प्रतिनिधींशी संवाद साधला.

‘‘राज्यात ओबीसी आणि मराठा आरक्षणावरून गावागावांत संघर्ष निर्माण झाला आहे. त्यामुळे स्फोटक परिस्थिती आहे. ज्याप्रमाणे मराठवाडा विद्यापीठाच्या नामांतर प्रक्रियेमध्ये आपण मध्यस्थी केली तशी या वेळीही करा,’’ अशी विनंती पवार यांना केल्याचे त्यांनी सांगितले.

ते म्हणाले, की मी सकाळी भेटीची वेळ न घेता अचानक शरद पवार यांना भेटण्यास गेलो होतो. ते निवासस्थानी आहेत इतके कळल्यानंतर मी गेलो होतो. त्यांची प्रकृती बरी नसल्याने ते विश्रांती घेत होते.

दीड तासानंतर त्यांनी मला बोलावले. ते बिछान्यावरच झोपून बोलत होते. मी कोणतेही राजकारण घेऊन आलेलो नाही. ना आमदार, मंत्री म्हणून आलेलो नाही, पक्षीय भूमिका नाही असे मी त्यांना सांगितले.

पण राज्यात ओबीसी आरक्षण तुम्ही राबविले. आता राज्यात स्फोटक परिस्थिती आहे. राज्यातील ज्येष्ठ नेते म्हणून तुमची जबाबदारी आहे. आता राज्यात शांतता निर्माण झाली पाहिजे, असे मी त्यांना सांगितले आहे,’’ असेही त्यांनी पत्रकारांशी बोलताना सांगितले

तसेच मराठवाडा विद्यापीठाला डॉ. बाबासाहेब आंबेडकर यांचे नाव देत असताना मराठवाड्यातील वातावरण पेटले होते. तेव्हा पवार यांनी केलेल्या हस्तक्षेपाची आठवण त्यांना करून दिली, असेही भुजबळ म्हणाले.

ते पुढे म्हणाले, की मनोज जरांगे यांना मुख्यमंत्र्यांनी, त्यांच्या मंत्र्यांनी काय चर्चा केली किंवा प्रा. लक्ष्मण हाके यांच्याशी मी काय चर्चा केली हे माहीत नसल्याचे पवार यांनी सांगितले. येत्या दोन दिवसांत मी मुख्यमंत्री एकनाथ शिंदे यांच्याशी फोन करून चर्चा करेन, असे भुजबळ यांनी बोलताना सांगितले.

'पटेल यांना भेटीची कल्पना’

शरद पवार यांना भेटण्यास जात असल्याचा दूरध्वनी मी प्रफुल्ल पटेल यांना केल्याचे भुजबळ यांनी सांगितले. मी घरून निघताना पटेल यांच्याशी चर्चा केली. शरद पवार यांच्याशी या विषयावर चर्चा करणार आहे, असे मी पटेल यांना कळवले होते, असे मंत्री छगन भुजबळ म्हणाले.

२४ तासांतच भुजबळ भेटीला

बारामती येथे जनसन्मान मेळाव्यात छगन भुजबळ भाषण करत असताना पाऊस आला. त्यामुळे भाषण आटोपते घेतले. पावसातच उपमुख्यमंत्री अजित पवार यांनी भाषण सुरू केले. पवार यांचे भाषण संपत असतानाच पाऊस थांबला आणि भुजबळ पुन्हा बोलायला उभे राहिले.

त्यावेळी शरद पवार यांचे नाव न घेता ते म्हणाले, की सर्वपक्षीय बैठकीला जाऊ नका असा महाविकास आघाडीच्या नेत्यांना बारामतीहून निरोप गेला, असा आरोप भुजबळांनी केला. मात्र, या आरोपाला २४ तास उलटत नाहीत तोच भुजबळ यांनी पवार यांचे निवासस्थान असलेल्या सिल्व्हर ओक गाठून त्यांच्याशी चर्चा केली.