Ashadhi Wari 2024 : वेळापुरात यंदा माऊलींचा मार्ग खडतरच

Velapur News : संत ज्ञानेश्वर महाराजांचा पालखी सोहळा आज सोलापूर जिल्ह्याच्या माळशिरस तालुक्यात येत असताना वेळापुरातील पालखी महामार्गावरील कामे, उड्डाण पूल जोडणीची सर्व्हिस रोडची कामे अपूर्ण आहेत. जिल्हाधिकारी कुमार आशीर्वाद यांनी जूनच्या पहिल्या आठवड्यात भेट देऊन अतिक्रमण काढण्यासह, उड्डाण पूल तातडीने पूर्ण करण्याच्या सक्त सूचना दिल्या होत्या. नॅशनल हायवे प्रशासन ठेकेदारांना तगादा लावत असल्याने ठेकेदार ही कामे घाई गर्दीत उरकून घेण्यात गुंतले आहे. मात्र, अद्याप कामे अपूर्णच आहेत.

याबाबत ठेकेदारांशी संपर्क साधण्याचा प्रयत्न केल्यास त्यांच्याशी संपर्क होऊ शकला नाही. मागील दोन वर्षे येथील उड्डाणपुलाचा गुंता सुटतासुटत नाही आणि प्रशासन ऐन पालखीच्या तोंडावर कामाला लागते, हा अनुभव यावर्षीही कायम आहे.

वेळापूर येथील पालखीतळ पालखी महामार्ग आणि अकलूज-सांगोला रस्त्याच्या चौकाशेजारीच असून, चौकातील उड्डाणपुलाचे काम काही व्यावसायिक इमारतींच्या आणि प्रशासनाच्या विवादात अडकलेले असताना उजव्या बाजूने पंढरपूरच्या दिशेने जाणारा सर्व्हिस रोड गटारीचे काम अपूर्ण ठेऊन कसाबसा चालू करण्यात प्रशासनाला यश आले आहे.

गतवर्षी सर्व दिंड्या आणि दिंडेकरी सर्व्हिस रस्त्याने प्रचंड गर्दीतून मार्ग काढत मार्गस्थ झाले. तर पालखी चौकातून पंढरपूरच्या दिशेने भरावा करून दिंडेकरांची वाहने जुन्या बस स्थानकापर्यंत नेण्याची व्यवस्था करण्यात आली होती. यावर्षी मात्र हीच अवजड वाहने महामार्गाच्या उजव्या बाजूने पंढरपूरच्या दिशेने जातील असे प्रशासनाचे नियोजन आहे. पुण्याच्या दिशेने आलेला उड्डाणपूल पालखी चौकात जोडून पंढरपूरकडे पायी जाणाऱ्या वारकऱ्यांची व्यवस्था केली जाईल, असे सांगितले जाते. परंतु अद्याप या उड्डाणपुलाच्या पूर्वेकडील काम अपूर्ण असून चिखल दलदल आणि घसरण असलेलाच आहे तर संरक्षक भिंतही त्या बाजूनी अद्याप करण्यात आलेली नाही.