Electricity Bill Recovery : थकीत १६६ कोटी वीजबिल वसुलीसाठी महावितरण आक्रमक

Akola News : अकोला परिमंडलांतर्गत अकोला, बुलडाणा आणि वाशीम जिल्ह्यांतील विविध वर्गवारीतील ग्राहकांकडे थकीत असलेल्या विजबिलाचे १६६ कोटी रुपये वसुलीसाठी महावितरणने मोहीम तीव्र केली आहे. वीजबिल भरण्याला प्रतिसाद न देणाऱ्या आठ हजार १०३ वीज ग्राहकांचा वीजपुरवठा खंडित करण्यात आला आहे. त्यामुळे कारवाई टाळण्यासाठी वीज ग्राहकांनी थकीत असलेल्या वीजबिलाची संपूर्ण रक्कम भरून सहकार्य करण्याचे आवाहन महावितरणने केले आहे.

महावितरण अकोला परिमंडलातील कृषी ग्राहक वगळून उच्चदाब आणि लघूदाब वर्गवारीतील सुमारे १३ लाख ७४ हजार ७९७ ग्राहक आहेत. यामध्ये घरगुती ग्राहक ९ लाख ५२ हजार ५७५, वाणिज्यिक ७० हजार ६७१, औद्योगिक २५ हजार ३०९, आणि इतर वर्गवारील १९ हजार ५७५ ग्राहकांचा समावेश असून त्यांना महावितरणकडून वीजपुरवठा करण्यात येतो.

परंतु परिमंडलात विविध वर्गवारीतील वीज ग्राहकांकडे १६६ कोटी रुपये वीजबिलाचे थकल्यामुळे महावितरणची आर्थिक अडचण निर्माण झाली आहे. त्यामुळे वसुलीसाठी महावितरणने मोहीम अधिक तीव्र केली आहे. वरिष्ठ अधिकाऱ्यांचा सहभाग असलेल्या या मोहिमेत थकबाकीदार ग्राहकांचा वीजपुरवठा खंडित करण्यात येत आहे.

परिमंडलात विविध वर्गवारीतील १६६ कोटी १६ लाख रुपयांच्या थकबाकीमध्ये १२९ कोटी २८ लाखांची थकबाकी घरगुती ग्राहकांची आहे. वाणिज्यिक ग्राहकांकडे १५ कोटी २ लाख, औद्योगिक ग्राहकांकडे १२ कोटी २२ लाख आणि इतर वर्गवारीतील वीज ग्राहकाकडे ९ कोटी ६३ लाख वीज बिलाचे थकले आहेत.

८१०३ थकबाकीदारांचा वीजपुरवठा खंडित

आर्थिक वर्षाच्या शेवटच्या टप्प्यात असतानाही वसुलीचे असलेले व्यस्त प्रमाण बघता थकबाकीदार ग्राहकांचा वीजपुरवठा खंडित करण्यात येणार आहे. मोहीम सुरू केल्यापासून आतापर्यंत ८ हजार १०३ ग्राहकांचा वीजपुरवठा खंडित करण्यात आला आहे. महावितरणची अधिकृत वीजबिल भरणा केंद्रे ३१ मार्चपर्यंत सार्वजनिक सुट्टीच्याही दिवशी कार्यालयीन वेळेत सुरू राहणार आहे. याशिवाय ग्राहक महावितरण मोबाईल ॲप, महावितरण संकेतस्थळावरूनही वीजबिल भरू शकतात.