Long March : जिल्हाधिकारी कार्यालयावर धडकले ‘लाल वादळ’

Nashik News : राज्यातील शेतकरी मोठ्या संकटात आहे. तसेच शासकीय, निमशासकीय मानधनावरील व कंत्राटी कर्मचारी यांच्याकडे शासनाचे अक्षम्य दुर्लक्ष होत आहे.

या प्रश्नाकडे शासनाचे लक्ष वेधून प्रमुख मागण्या मान्य करून घेण्यासाठी मार्क्सवादी कम्युनिस्ट पक्ष व आदिवासींच्या विविध संघटनांच्या वतीने नाशिक मुंबई लाँग मार्चचे प्रणेते व माजी आमदार कॉ. जे. पी. गावीत यांच्या नेतृत्वाखाली लाँग मार्च काढण्यात आला. शेतकरी, कष्टकरी हजारोंच्या संख्येने सोमवारी (ता. २६) नाशिक जिल्हाधिकारी कार्यालयावर धडकले.

मार्क्सवादी कम्युनिस्ट पक्षाच्या माध्यमातून शेतकरी व कर्मचाऱ्यांनी या विराट शेतकरी लाँग मार्च व महामुक्काम अंदोलनात प्रचंड संख्येने सहभागी होण्याचे आवाहन करण्यात आले होते. त्यानुसार जिल्ह्यातील १५ तालुक्यांतून २५ हजारांहून अधिक शेतकऱ्यांचा सहभाग आहे. ते जिल्हाधिकारी कार्यालयासमोर महामुक्काम करणार आहेत.

२०२३ मध्ये शेतकरी, कष्टकऱ्यांच्या मागण्यांसाठी पायी लाँग मार्च काढला होता. त्या वेळी सरकारने हे प्रश्न सोडवण्याचे आश्वासन दिले; मात्र फक्त शब्द दिला, अंमलबजावणी केली नाही. त्यामुळे या सरकारने फसवणूक केली आहे.

सरकारने हवा तेवढा वेळ घ्यावा, आम्ही शिधा पाणी घेऊन मुक्कामी आलो आहोत. आम्ही इथेच थांबणार आहोत, निर्धाराने आलोय आता मागे हटणार नाही, अशी प्रतिक्रिया माजी आमदार जेपी गावित यांनी ‘ॲग्रोवन’शी बोलताना दिली.