Ajit Pawar : कोल्हापूर पद्धतीच्या बंधाऱ्यांचे बॅरेजसमध्ये रूपांतर करावे : अजित पवार

Mumbai News : ‘‘सिंचनासाठी आवश्यक ठिकाणी कोल्हापूर पद्धतीच्या बंधाऱ्यांचे रूपांतर बॅरेजेसमध्ये करून पाणी साठवण क्षमतेत वाढ करण्याची कार्यवाही गतीने करावी,’’ असे निर्देश उपमुख्यमंत्री अजित पवार यांनी बुधवारी (ता. ७) दिले.

जलसंपदा विभागाशी संबंधित सोलापूर, कोल्हापूर, हिंगोली, बीड या जिल्ह्यांतील विविध प्रलंबित योजनांसंदर्भातील वित्तीय व अन्य प्रश्‍नांसंदर्भात श्री. पवार यांच्या अध्यक्षतेखाली मंत्रालयात बैठक झाली. श्री. पवार म्हणाले, ‘‘राज्यातील विविध सिंचन प्रकल्पांच्या दुरुस्तीसाठी निधीची आवश्यकता आहे.

काही मध्यम सिंचन प्रकल्प पूर्ण क्षमतेने भरत नसल्याने उन्हाळ्यात पाण्याची कमतरता भासते. गडहिंग्लज तालुक्याच्या पूर्व भागातील पाण्याचा प्रश्‍न कायमस्वरूपी सोडविण्यासाठी किटवडे प्रकल्प आंतरराज्य प्रकल्प म्हणून पूर्णत्वास यावा.

यामध्ये साठवण क्षमता वाढविल्यास त्याचा कर्नाटकसह गडहिंग्लज तालुक्यातील पूर्व भागाला फायदा होऊ शकतो. त्यातून या भागातील नागरिकांना पिण्याचे व सिंचनाचे पाणी मिळेल. याबाबत जलसंपदा विभागाने कर्नाटक शासनाशी पत्रव्यवहार करून कार्यवाही करावी.’’

बैठकीला आमदार बबनराव शिंदे, राजेश पाटील, संजय शिंदे, बाळासाहेब आजबे, यशवंत माने, चंद्रकांत नवघरे, माजी आमदार अमरसिंह पंडित, वित्त विभागाचे अपर मुख्य सचिव ओ. पी. गुप्ता, जलसंपदा विभागाचे अपर मुख्य सचिव डॉ. दीपक कपूर अधिकारी उपस्थित होते.