Kolhapur APMC : शेतकरी उत्पादक कंपन्यांना कोल्हापूर बाजार समिती परवाने देणार

Kolhapur News : केंद्र सरकारने अल्पभूधारक शेतकऱ्यांचा शेतीमाल संकलित करून बाजारपेठेत नेणे व त्याचे विक्री करून शेतकऱ्यास योग्य मोबदला मिळावा या हेतूने शेतकरी उत्पादक कंपनीची निर्मिती केलेली आहे.

अशा कंपन्यांना बाजार समितीतर्फे शेतीमाल खरेदी-विक्रीचे परवाना देण्यात येतील, अशी माहिती बाजार समितीचे सभापती ॲड. प्रकाश देसाई यांनी दिली. शेतकरी उत्पादक कंपन्यांनी त्यांच्या सभासदांकडून संकलित केलेला शेतीमाल बाजारपेठेत विकण्यासाठी बाजार समितीकडून सहकार्य मागितले होते.

या संदर्भात बाजार समितीत बैठक झाली. त्‍यात हा निर्णय घेण्यात आला. बैठकीस कोल्हापूर व सिंधुदुर्ग जिल्ह्यांतील शेतकरी उत्पादक कंपन्यांचे प्रतिनिधी उपस्थित होते. या प्रतिनिधींनी शेतीमाल खरेदीसाठी बाजार समितीत असलेल्या पायाभूत सुविधा देण्याची मागणी केली. त्याला बाजार समितीचे सचिव जयवंत पाटील यांनी मान्याता देत परवाने देण्यात येतील, असेही जाहीर केले.

या वेळी राज्य कृषी पणन विभागाचे प्रतीक गोनुगडे म्हणाले, की शेतकरी उत्पादक कंपन्या केंद्र सरकारच्या ई-नाम योजनेशी जोडलेल्या आहेत. त्यामुळे केंद्र सरकारकडून अनुदान व अन्य सुविधा देण्यासाठी पणन मंडळाकडून पाठपुरावा सुरू आहे.

त्याचाही लाभ शेतकरी सभासदांना होणार आहे. त्यामुळे शेतकरी कंपन्यांनी बाजार समितीकडून परवाने घ्यावेत. या वेळी पणन मंडळाचे सत्यजित भोसले, ई-नामचे रोहित पाटील आदी उपस्थित होते.