Kolhapur Flood : शिरोळ तालुक्यात पूरग्रस्तांना सानुग्रह अनुदान वाटप सुरू

Kolhapur News : महापुराचा फटका बसलेल्या शिरोळ तालुक्यातील ४४ गावांतील १ हजार ३६६ कुटुंबांना प्रत्येकी १० हजार रुपयांचे सानुग्रह अनुदान वाटप करण्यात येत आहे. १ कोटी ३६ लाख ६० हजार रुपयांचे वाटप केले जाणार आहे.

जुलैमध्ये कृष्णा, वारणा, पंचगंगा व दूधगंगा या चार नद्यांना आलेल्या महापुरामुळे तालुक्यातील नदी व ओढ्यांच्या काठासह सुमारे १० हजार ६०० हेक्टरवरील शेती पिकाचे नुकसान झाले आहे. यात सर्वाधिक नुकसान ऊस व भाजीपाल्याचे आहे. तालुक्यात कोबी, फ्लॉवर, मिरची, दोडका यासह अन्य पिकांचे व नवीन ऊस लागण केलेल्या शेतकऱ्यांना मोठा फटका बसला आहे.

पंधरा दिवसांपासून कृषी महसूल विभागाकडून शेतीचे पंचनामे करण्यात आले आहेत. आता प्रत्यक्षात तालुका कृषी कार्यालयात अहवाल तयार करण्याचे काम सुरू आहे. यात २४ हजार ६३४ शेतकऱ्यांची १० हजार ६०० हेक्टर जमीन बाधित झाली असून या नुकसानापोटी २५ कोटी ६७ लाख रुपये भरपाईचा प्रस्ताव शासनाकडे सादर करण्याचे काम सुरू आहे.

दरम्यान तालुक्यात ४४ गावांत महापूर आल्याने १ हजार ३६६ कुटुंबांच्या घरात महापुराचे पाणी आले होते. त्यामुळे त्या कुटुंबांना स्थलांतरित व्हावे लागले होते. यात ६८४ पूरग्रस्तांना ६८ लाख ४० हजार रुपये वाटप करण्यात आले आहेत. तर ६८२ कुटुंबांच्या खात्यात ६८ लाख २० हजार रुपये जमा करण्यात येणार आहेत. त्याची रक्कम कुटुंबाला प्रत्येकी १० हजार प्रमाणे १ कोटी ३६ लाख ६० हजार रुपये आहे.

 शेती नुकसानीचा २५ कोटी ६७ लाखाचा प्रस्ताव

महापुरामुळे तालुक्यातील १० हजार ६०० हेक्टरमधील पिकांचा चिखल झाला. याचे पंचनामे पूर्ण झाले असून कृषी विभागाकडून अहवाल तयार करण्यात येत आहे. २५ कोटी ६७ लाख रुपये नुकसान झाल्याचा प्रस्ताव पाठवण्यात येणार आहे.