Kolhapur Irrigation Department : कोल्हापूर जिल्हा ‘सिंचन’ची थकबाकी ११६ कोटी रुपयांची

Kolhapur News : कोल्हापुर जिल्ह्यात सिंचन विभागाच्या पाणीपट्टीची तब्बल ११६ कोटी १६ लाख रुपये थकबाकी आहे. वर्षानुवर्षे ही थकबाकी न भरल्याने आकडा वाढत गेला आहे. त्यामुळे जादा थकबाकी असलेल्या सुमारे १७ हजार २५० जणांना पाटबंधारे विभागाकडून वसुलीच्या नोटिसा पाठविण्यात आल्या आहेत. या आर्थिक वर्षातील वसुलीचे उद्दिष्ट पूर्ण करण्यासाठी कार्यवाही सुरू आहे.

पाटबंधारे विभागाला दर वर्षी सिंचन व बिगर सिंचनाच्या पाणीपट्टी वसुलीसाठी उद्दिष्ट दिले जाते. त्यानुसार या आर्थिक वर्षात पाटबंधारे उत्तर विभागासाठी ‘सिंचन’करिता साडे चौदाकोटी रुपये उद्दिष्ट देण्यात आले आहे. आतापर्यंत सुमारे दोन कोटी ६८ लाख रुपये पाणीपट्टी वसुली झाली आहे. ‘बिगर सिंचन’साठी ३२ कोटी रुपयांचे उद्दिष्ट देण्यात आले आहे. आतापर्यंत २८ कोटी ४१ लाख रुपये वसुली झाली आहे.

त्याचबरोबर दक्षिण विभागात ‘सिंचन’साठी पाच कोटी ५० लाख रुपयांचे उद्दिष्ट देण्यात आले असून आतापर्यंत दोन कोटींची वसुली झाली आहे. तर ‘बिगर सिंचन’साठी तीन कोटींचे उद्दिष्ट असून आतापर्यंत ६३ लाख रुपयांची वसुली झाली आहे. वसुलीची रक्कम ऑनलाईनद्वारे जमा करून घेतली जात आहे. पाटबंधारे विभागाच्या शाखांमध्ये ही बिले भरून घेतली जात आहेत. तसेच विभागाचे कर्मचारीही प्रत्यक्ष भेटी देऊन बिले गोळा करत आहेत.

उत्तर व दक्षिण विभागाचे मिळून पाणीपट्टीचे ११५ कोटी १६ लाख रुपये थकीत आहेत. यातील १० हजार ते एक लाखांपर्यंत थकबाकी असलेल्या प्रातिनिधीक १७ हजार २५० थकबाकीदारांना वसुलीच्या नोटिसा पाठविल्या आहेत. यामध्ये उत्तर विभागातील १० हजार ७५० थकबाकीदार व दक्षिण विभागातील सहा हजार ५०० थकबाकीदारांचा समावेश आहे. दक्षिण विभागातील २८ कोटींची थकबाकी असून तीन कोटींची वसुली झाली आहे. उत्तर विभागात थकबाकी एकूण ९० कोटी १६ लाख असून वसुलीसाठी प्रयत्न सुरू आहेत.

उत्तर-दक्षिण’ विभागाचे कार्यक्षेत्र व ग्राहक

पाटबंधारे उत्तर विभागाचे कार्यक्षेत्र भुदरगड, गडहिंग्लज, चंदगड, आजरा हे आहे, तर दक्षिण विभागात करवीर, राधानगरी, कागल, हातकणंगले, शिरोळ, शाहूवाडी, पन्हाळा, गगनबावडा हे तालुके येतात. याचे ग्राहक हे औद्योगिक असून यामध्ये महापालिका, नगरपालिका, ग्रामपंचायती, साखर कारखाने, ‘एमआयडीसी’तील मिल व कारखाने आदींचा समावेश आहे. तसेच दक्षिण विभागाचे कार्यक्षेत्र हे भुदरगड, गडहिंग्लज, आजरा, चंदगड या तालुक्यांचे आहे. याचे ग्राहक हे शेतकरी व ग्रामीण पाणीपुरवठा संस्था आहेत.