Crop Insurance : कोल्हापूर जिल्ह्यातील ४ हजार शेतकऱ्यांनी घेतला पीकविमा

Kolhapur News : यंदाही खरीप विमा योजनेत जिल्ह्यातील शेतकऱ्यांचा सहभाग कमीच आहे. जुलैअखेर यंदा केवळ ४०५७ शेतकऱ्यांनीच योजनेत सहभाग घेतला आहे. २८५८ हेक्टर क्षेत्र विमा संरक्षित झाले आहे. भरपाई मिळण्यातील अडचणी अधिक असल्याने विमा भरण्यात प्रतिसाद कमी असल्याचे सांगण्यात येते.

शिरोळमध्ये सर्वाधिक ७८२ शेतकऱ्यांनी योजनेत सहभाग घेतला. तर गगनबावडा तालुक्यात केवळ पाच शेतकऱ्यांनी विमा उतरवला आहे. गत वर्षीपर्यंत एक रुपयात पीकविमा उतरविण्याची अंमलबजावणी सुरू होती. परंतु, यंदा शेतकऱ्यांनीच पीकनिहाय विमा हप्ता भरावयाचा आहे. त्याचाही परिणाम विमा उतरविण्यावर झाला आहे.

शिवाय यंदाच्या योजनेत सहभागी शेतकऱ्यांना पीक कापणी प्रयोगाद्वारे भरपाई देण्यात येणार आहे. हवामान घटकामुळे पेरणी, स्थानिक नैसर्गिक आपत्ती, हंगामातील प्रतिकूल परिस्थिती व काढणीपश्चात नुकसान भरपाई यांसारख्या अतिरिक्त संरक्षण यंदाच्या योजनेत लागू नाही.

शिवाय पीकविमा भरपाईसाठी ई-पीक पाहणीअंतर्गत पिकांची नोंदणी आणि ॲग्रीस्टॅक फार्मर आयडीही बंधनकारक केला आहे, अशी विविध कारणे यंदा प्रतिसाद न मिळण्यामागे आहेत. त्यातच जिल्ह्यात अल्पभूधारकांची संख्या अधिक असल्याने विमा उतरविण्यात स्वारस्य दाखविले नसल्याचे सांगण्यात येते. परिणामी सर्वच तालुक्यात अल्प प्रतिसाद मिळाला आहे.

आजरा तालुक्यात केवळ ४३ शेतकरी

आजरा तालुक्यात केवळ ४३ शेतकऱ्यांनीच विमा भरला आहे. भुदरगड, करवीर, शाहूवाडी या तालुक्यांत अद्याप दोनशेचा आकडाही पार केलेला नाही. शिरोळ, गडहिंग्लज, राधानगरी, हातकणंगले, चंदगड, कागल, पन्हाळा या तालुक्यांत शेतकऱ्यांचा काहीसा प्रतिसाद असला तरी अद्याप कोणत्याही तालुक्याने हजाराचा आकडा ओलांडलेला नाही. एक रुपयात पीकविमा होता तेव्हा गडहिंग्लज तालुक्याचेच उदाहरण द्यायचे झाले तर गत वर्षी ४१८५ शेतकऱ्यांनी विमा भरला होता. यंदा हा आकडा केवळ ६३० पर्यंत आहे.