Kharif Sowing Khandesh : खानदेशात पेरणी ५० टक्क्यांपर्यंत

Jalgaon News : खानदेशात या आठवड्यात काही भागात पाऊस झाला. तसेच पुढे पावसाचे संकेत लक्षात घेऊन अनेकांनी पेरणी केली. पेरण्यांची टक्केवारी वाढली असून, खानदेशात सुमारे ५० टक्के क्षेत्रात खरिपातील पिकांची पेरणी झाली आहे.

कापूस लागवड अपेक्षेपेक्षा कमीच आहे. कापूस लागवडीत घट होईल, असा अंदाज सुरवातीपासून होता. अन्य पिकांच्या तुलनेत कापसाखालील क्षेत्र अधिक आहे. परंतु कापसाचे क्षेत्र तिन्ही जिल्ह्यांत मागील हंगामाच्या तुलनेत कमीच आहे.

धुळे जिल्ह्यात सुमारे चार लाख हेक्टरवर, नंदुरबारात तीन लाख हेक्टरवर आणि जळगाव जिल्ह्यात सुमारे सात लाख ६७ हजार हेक्टरवर खरिपातील पिकांची पेरणी होईल. यातील सात ते आठ टक्के क्षेत्र नापेर राहील. कारण अनेक शेतकरी पुढे रब्बीसह केळी पिकासाठी क्षेत्र नापेर ठेवतात.

यात यंदा जूनमध्ये सुरवातीला पेरणीची टक्केवारी कमी दिसत होती. परंतु या आठवड्यात पेरण्यांची गती वाढली व पेरणीची टक्केवारीदेखील वधारली आहे. जळगाव जिल्ह्यात दोन लाख ७० हजार हेक्टरवर कापूस लागवड झाली आहे.

मागील हंगामात जिल्ह्यात जूनच्या अखेरपर्यंत कापूस लागवड साडेतीन लाख हेक्टरपर्यंत पोचली होती. यंदा जळगाव जिल्ह्यात कापसाखालील क्षेत्रात ५० ते ६० हजार हेक्टरने घट होईल, अशी स्थिती आहे.

मक्याची लागवड जळगावात सुमारे ६१ हजार हेक्टरवर झाली आहे. सोयाबीनचा पेरा सुमारे साडेसात हजार हेक्टरवर झाला आहे. उडदाची दोन हजार हेक्टरवर तर मुगाची चार हजार हेक्टरवर पेरणी झाली आहे.

ज्वारीची पेरणी कमी असून, सुमारे ११०० हेक्टरवर ज्वारी पीक आहे. हलक्या व मध्यम जमिनीत काहींनी कमी पाऊस असल्याने पेरणी टाळली आहे. तर अनेकांनी कमी पाऊस असतानादेखील उडीद, मूग, सोयाबीन पेरणीची मुदत संपेल या अडचणीतून या आठवड्यात पेरणी पूर्ण केली आहे. पेरणीनंतर काही भागात पाऊस झाला. तर काही भागात फारसा पाऊस नव्हता.

पेरणी स्थिती अशी..

धुळे जिल्ह्यात सुमारे एक लाख हेक्टरवर कापूस लागवड झाली आहे. त्यापाठोपाठ मका, सोयाबीनची पेरणी झाली आहे. नंदुरबारातही सुमारे ४० हजार हेक्टरवर कापूस लागवड झाली आहे. त्यापाठोपाठ मका, सोयाबीनची पेरणी झाली आहे. नंदुरबारातील तळोदा व अन्य भागात पेरणीसाठी वाफसा नव्हता. परंतु या आठवड्यात वाफसा झाल्याने पेरण्यांना गती आली आहे.