Farmer Suicides Solution: शाश्‍वत प्रयत्नांतून शेतकरी आत्महत्या रोखणे निश्‍चित शक्य : नितीन गडकरी

Nagpur News: दर्जेदार बियाणे, सिंचन, तंत्रज्ञान या मूलभूत बाबींची उपलब्धता नसल्याच्या परिणामी विदर्भातील शेतीची अवस्था वाईट झाली. त्यातून नैराश्‍य वाढत अकोला, वाशीम, बुलडाणा, अमरावती, यवतमाळ, वर्धा या सहा जिल्ह्यांत शेतकरी आत्महत्या वाढल्या. हा प्रश्‍न आंतरराष्ट्रीय झाला. यावर एकाचवेळी मात करणे शक्‍य नसले, तरी टप्प्याटप्प्याने प्रयत्न केल्यास शेतकरी आत्महत्या रोखणे शक्य होईल, असा विश्‍वास केंद्रीय मंत्री नितीन गडकरी यांनी व्यक्‍त केला.

वसंतराव नाईक कृषी तंत्रज्ञान विस्तार संस्था (वनामती) येथे शुक्रवारी (ता. ११) ॲग्रोव्हिजन, महाऑरेंज या संस्थांच्या वतीने संत्रा उत्पादकांसाठी आयोजित कार्यशाळेत गडकरी बोलत होते. कृषी विद्यापीठाचे तज्ज्ञ डॉ. डी. एम. पंचभाई, राज्यसभा सदस्य डॉ. अनिल बोंडे, आमदार चरणसिंग ठाकूर, रवी बोरटकर, केंद्रीय लिंबूवर्गीय संस्थेचे डॉ. दिलीप घोष, महाऑरेंजचे संचालक श्रीधर ठाकरे यांची या वेळी उपस्थिती होती. केंद्रीय मंत्री नितीन गडकरी यांच्यासह ३२ शेतकऱ्यांनी नुकताच स्पेन दौरा केला होता. या वेळी त्यांनी त्या भागातील संत्रा लागवड, व्यवस्थापन तंत्राची माहिती घेतली. त्या तंत्रज्ञानाविषयी या कार्यशाळेत ऊहापोह करण्यात आला.

या वेळी गडकरी म्हणाले, ‘‘जागतिकस्तरावर जे-जे चांगले असेल इतकेच काय तर आपल्या शेजारचा शेतकरी जरी चांगले करीत असेल तरी त्याचा अंगीकार केला पाहिजे. पिकांच्या उत्पादकतेत मातीचा कर्ब महत्त्वाचा ठरतो. त्याकरिता सेंद्रिय घटकांचा वापर शेतकऱ्यांनी वाढविला पाहिजे.’’

शेतीचे उत्पन्न पोहोचेल एक कोटींवर

आमची धापेवाडा शिवारात शेती आहे. यातून एकरी चौदा क्‍विंटल तूर झाली. या सेंद्रिय शेतमालावर गावातीलच दालमिलवर प्रक्रिया केली. त्याचे पॅकिंग करीत भक्‍ती फार्म आणि उत्पादक म्हणून पत्नीचे नाव नोंदविले. त्यातून विश्‍वासार्हतेने ग्राहक खरेदी करतील, असे अपेक्षित होते. एका एकरात ८८ टन ऊस झाला. काही शेतकरी १०० टनांपर्यंत पोहोचले आहेत. या सर्व प्रयोगांतून माझे शेतीचे उत्पन्न कोटींच्या घरात जाईल, असा विश्‍वास श्री. गडकरी यांनी व्यक्‍त केला.