Humani Pest Issue : सोयाबीन पिकावर हुमणी किडीचा प्रादुर्भाव

Buldhana News : बुलडाणा जिल्ह्यातील काही भागांत सोयाबीन पिकात हुमणी किडीचा प्रादुर्भाव झाल्याचे दिसून येत आहे. किडीचे तज्ज्ञांच्या सल्ल्याने वेळीच नियंत्रण करावे, असे आवाहन कृषी विज्ञान केद्र व कृषी विभागाच्या वतीने करण्यात आले आहे.

कृषी विज्ञान केंद्राच्या कीड सर्वेक्षणात सोयाबीन पिकात हुमणी किडीचा प्रादुर्भाव चिखली तालुक्यातील काटोडा, अमोना, चंदनपूर, अंत्री या गावांत आढळून आला आहे. किडीची अळी जमिनीत राहून पिकांच्या मुळावर हल्ला करून उपजीविका करते.

त्यामुळे झाडे वाळतात. जिल्ह्यामध्ये कमी पाऊस आहे आणि हलकी जमीन आहे, अशा ठिकाणी या किडीचा प्रादुर्भाव आढळून आला आहे.

नियंत्रणासाठी सद्यःस्थितीत करावयाच्या उपाययोजनेत मेटारायझियम ॲनिसोप्ली या जैविक कीटकनाशकाचा किंवा शिफारस केलेल्या कीटकनाशकांचा वापर कृषी विद्यापीठातील तज्ज्ञांच्या सल्ल्याने करावा. कृषी विज्ञान केंद्राचे विषय विशेषज्‍ज्ञ कीटकशास्त्र प्रवीण देशपांडे, वरिष्ठ शास्त्रज्ञ तथा प्रमुख डॉ. ए एस. तारू यांनी याबाबत आवाहन केले आहे.