Health Center : आरोग्य केंद्राअभावी रुग्णांची गैरसोय

Mumbai News : मासवण प्राथमिक आरोग्य केंद्राच्या कार्यक्षेत्रातील पाच गावांचे अंतर प्राथमिक आरोग्य केंद्रापासून सुमारे दहा किलोमीटर अंतरावर असल्याने पाचही गावांच्या रुग्णांना जिल्हा परिषदेच्या आयुर्वेदिक दवाखान्यात उपचार घेण्याची वेळ आली आहे.

गरोदर आणि बाळंत महिलांना उपचारासाठी मनोर ग्रामीण रुग्णालय किंवा परिसरातील खासगी रुग्णालयाचा आधार घ्यावा लागत आहे. यामुळे नागरिकांची गैरसोय तर होतच आहे, शिवाय आर्थिक भुर्दंडही बसत आहे. त्यामुळे नवीन प्राथमिक आरोग्य केंद्र तयार करण्याची मागणी नागरिकांकडून केली जात आहे.

मासवण प्राथमिक आरोग्य केंद्राच्या कार्यक्षेत्रातील दहिसरतर्फे मनोर, गुंदावे, साखरे, नावझे आणि गिराळे गावांमधील रुग्णांना उपचारासाठी दहिसरतर्फे मनोर गावातील जिल्हा परिषदेच्या आयुर्वेदिक दवाखान्याचा आधार घ्यावा लागत आहे. दहा ते बारा हजार लोकसंख्या असलेल्या या परिसरातील रुग्णांना दहिसरचा दवाखाना सोयीचा ठरत आहे.

बेताची आर्थिक परिस्थिती असलेले रुग्ण मोफत आरोग्य सेवा उपलब्ध असल्याने जिल्हा परिषदेच्या दवाखान्यात उपचारासाठी येत असतात. परंतु आयुर्वेदिक उपचार पद्धतीचा दवाखाना असल्याने रुग्णांवर उपचारासाठी मर्यादा येत आहेत. मसवण प्राथमिक आरोग्य केंद्र पाच गावांपासून दहा किलोमीटरच्या अंतरावर असल्याने रुग्णांचा प्रवास भाड्याचा खर्च करावा लागत असून वेळेचा अपव्ययही होत आहे.

वरई पारगाव रस्त्यावरील पाच गावांचा समावेश करून अतिरिक्त प्राथमिक आरोग्य केंद्र पाच गावांच्या परिसरात मंजूर करण्याची मागणी जोर धरत आहे. पालघर तालुक्यात दहा प्राथमिक आरोग्य केंद्रे आहेत. त्यापैकी सफाळे प्राथमिक आरोग्य केंद्राचे श्रेणी वर्धन होऊन ग्रामीण रुग्णालय घोषित करण्यात आले आहे.

सफाळे ग्रामीण रुग्णालय झाल्यानंतर पालघर तालुक्यात एक प्राथमिक आरोग्य केंद्र रिक्त होणार आहे. वसई तालुक्यातील दोन प्राथमिक आरोग्य केंद्रांच्या कार्यक्षेत्राचे महापालिका क्षेत्रात समावेश झाल्याने दोन प्राथमिक आरोग्य केंद्रे अतिरिक्त ठरत आहेत. सफाळे रेल्वे स्थानकाच्या पूर्व भागात नव्याने मंजूर झालेलल्या पारगाव प्राथमिक आरोग्य केंद्राला भूखंड उपलब्ध होऊनही इमारतीच्या कामाला सुरुवात झालेली नाही.