Natural Disasters Deaths : मराठवाड्यात नैसर्गिक आपत्तीत ८१ दिवसांत ३४ जणांचा मृत्यू

Chhatrapati Sambhajinagar News: मराठवाड्यातील आठही जिल्ह्यात एक जून ते २० ऑगस्ट दरम्यान विविध नैसर्गिक आपत्तीत ३४ जणांना आपला जीव गमवावा लागला. त्याबरोबरच ४८४ जनावरे या आपत्तीत दगावली असून ५२७ घरांची कमी-अधिक प्रमाणात पडझड झाली. तसेच ५५ गोठ्यांचेही नुकसान झाले.

मराठवाड्यात यंदा पावसाचे प्रमाण लहरी व कमीच आहे. असे असले तरी नैसर्गिक आपत्तीत बळी जाणाऱ्यांची संख्या ही मोठी आहे. यामध्ये अंगावर वीज पडून मृत्यू झालेल्यांची संख्या सर्वाधिक असून त्यापाठोपाठ पुरात वाहून गेल्याने व अंगावर वादळात गोठा पडून मृत्यू झालेल्यांचाही समावेश आहे.

प्रशासनाच्या माहितीनुसार, मृत्यू पावलेल्या ३४ व्यक्तींमध्ये सर्वाधिक ८ व्यक्ती लातूर जिल्ह्यातील असून त्या पाठोपाठ नांदेड व परभणीतील प्रत्येकी सहा, बीडमधील चार, छत्रपती संभाजीनगर व हिंगोलीतील प्रत्येकी तीन, धाराशिव व जालन्यातील प्रत्येकी दोन व्यक्तींचा समावेश आहे.

या नैसर्गिक आपत्तीत १६ व्यक्ती जखमी झाल्या आहेत त्यामध्ये लातूरमधील चार, जालन्यातील सहा, छत्रपती संभाजीनगरमधील तीन तर परभणी, बीड व धाराशिव मधील प्रत्येकी एका व्यक्तीचा समावेश आहे.

जवळपास ५२७ कच्च्या पक्क्या घरांची कमी अधिक प्रमाणात पडझड झाली. त्यात छत्रपती संभाजीनगरमधील पाच व लातूरमधील एका घराची पूर्णतः पडझड झाली. १४९ पक्या घरांची अंशतः पडझड झाली. त्यात धाराशिवमधील सर्वाधिक ९९, लातूरमधील १६, बीडमधील २, जालन्यातील ३ व छत्रपती संभाजीनगरमधील २९ पक्क्या घरांचा समावेश आहे.

३६० कच्च्या घरांची अंशतः पडझड झाली. त्यात लातूरमधील २२६, धाराशिवमधील ६०, परभणीतील १० व छत्रपती संभाजीनगरमधील ५६ कच्च्या घरांचा समावेश आहे. ५५ गोठ्यांचीही हानी झाली असून त्यात धाराशिवमधील १३, छत्रपती संभाजीनगर व लातूरमधील प्रत्येकी एका गोठ्याचा समावेश आहे.