Tur Rate : खानदेशात कोरडवाहू तुरीला एकरी दोन क्विंटलपर्यंत उतारा

Jalgaon News : जळगाव ः खानदेशात तुरीची मळणी जवळपास पूर्ण होत आली आहे. उत्पादन यंदा कमी किंवा एकरी दीड ते दोन क्विंटल एवढे कोरडवाहू क्षेत्रात हाती येत आहे. बागायती क्षेत्रातही एकरी पाच ते आठ क्विंटल एवढे उत्पादन मिळत आहे.

तुरीची लागवड खानदेशात कापसात आंतरपीक म्हणून केली जाते. तसेच काही शेतकऱ्यांचा कल मुख्य पीक म्हणून तूर लागवडीकडे आहे. जळगाव जिल्ह्यातील रावेर, मुक्ताईनगर, बोदवड, जामनेर, धुळ्यातील शिरपूर, नंदुरबारातील नवापूर, नंदुरबार भागात अनेक शेतकरी मुख्य पीक म्हणून तुरीची लागवड करतात. तर कापूस, सोयाबीन, उडीद, मूग आदी पिकांत आंतरपीक म्हणूनही तुरीची लागवड खानदेशात केली जाते.

यंदा सुमारे तीन हजार हेक्टरवर तुरीची लागवड झाली होती. ही लागवड यंदा बऱ्यापैकी होती. परंतु जूनमध्ये पावसाचा खंड होता. जुलैत पाऊस आला. पुन्हा ऑगस्टमध्ये पावसाने दडी मारली. ऑक्टोबरमध्ये परतीचा पाऊस नव्हता. नोव्हेंबरमध्ये झालेल्या पावसात तुरीला काही भागात लाभ झाला. परंतु नैसर्गिक फटकाही बसला.

अनेक भागात तुरीत मर रोग आला आणि यात पीक वाळून पूर्णतः नुकसानही झाले. मर रोगाने २० ते २५ टक्के नुकसान अनेक भागात झाले. याचा परिणाम कोरडवाहू तूर उत्पादनावर अधिक झाला आहे. बागायती तूर पीक बरे होते. त्यात शेतकऱ्यांनी सिंचन केले. काही शेतकऱ्यांनी ठिबकद्वारे पाणी दिले.