Solar Energy : ऊर्जेचा सदुपयोग होण्यासाठी नवीन संकल्पना अमलात आणा

Pune News : ‘‘भारतात मोठ्या प्रमाणात सूर्यप्रकाश पडतो. सौरऊर्जा मोठ्या प्रमाणात निर्माण होऊ शकते. याऊर्जेचा सदुपयोग होण्यासाठी नवीन संकल्पना अमलात आणण्याची गरज आहे. अखिल भारतीय तंत्र शिक्षण परिषद यावर भर देत आहे,’’ असे अखिल भारतीय तंत्रशिक्षण परिषदेचे सल्लागार डॉ. राजेंद्र काकडे यांनी सांगितले.

अवसरी खुर्द (ता.आंबेगाव) येथे शासकीय अभियांत्रिकी महाविद्यालयात अखिल भारतीय तंत्रशिक्षण परिषद नवी दिल्ली यांच्या ‘वाणी’ योजनेअंतर्गत आयोजित केलेल्या ‘द्वितीय राष्ट्रीय परिषदे’च्या उद्घाटनप्रसंगी ‘शाश्वत विकासासाठी ऊर्जा आणि पर्यावरण’ या विषयावर डॉ. काकडे बोलत होते.

अध्यक्षस्थानी शासकीय अभियांत्रिकी महाविद्यालयाचे प्राचार्य डॉ. दिलीप पानगव्हाणे होते. या वेळी सावित्रीबाई फुले पुणे विद्यापीठाचे प्र-कुलगुरू डॉ.पराग काळकर, सी-ग्रीन संस्थेचे व्यवस्थापकीय संचालक डॉ. नितीन माटे, शासकीय तंत्रनिकेतन महाविद्यालयाचे प्राचार्य डॉ. विठ्ठल बांदल, परिषदेचे संघटन सचिव डॉ.चंद्रशेखर सेवतकर उपस्थित होते.

डॉ.काकडे म्हणाले, की सौरऊर्जेचा वापर प्रभावी वापर कृषी क्षेत्रात करण्याची गरज आहे. यासाठी विविध प्रयोग यशस्वी झाले आहेत. यासाठी विद्यार्थ्यांना प्रोत्साहन देण्याची गरज आहे. तसेच येणाऱ्या काळात नवीन शैक्षणिक धोरणाची अंमलबजावणी पूर्णपणे झाल्यानंतर विद्यार्थ्यांना रोजगाराच्या विविध संधी उपलब्ध होतील. तसेच त्यांचे कौशल्य उंचावेल. त्या दृष्टीने प्रयत्न सुरू आहेत.

डॉ. पानगव्हाणे म्हणाले, की भारतातील शेकडो महाविद्यालयांनी पाठवलेल्या प्रस्तावातून राष्‍ट्रीय परिषदेसाठी येथील शासकीय अभियांत्रिकी महाविद्यालयाच्या प्रस्तावाची निवड शिक्षण परिषदेने केली. विशेष म्हणजे या परिषदेचे सर्व कामकाज मराठी भाषेत करण्यात आले. परिषदेला जास्तीत जास्त संशोधक, उद्योग क्षेत्रातील प्रतिनिधी व विद्यार्थ्यांचा सहभाग कौतुकास्पद आहे.

संशोधकांनी २५ शोधनिबंध सादर केले. डॉ.महेश शिंदीकर, अजित गाडगीळ, मेधा ताडपत्रीकर, अँड.राहुल पडवळ यांनी शोध निबंधाबाबत मार्गदर्शन केले.