Crop Insurance : पीकविमा कंपनीची बंद कार्यालये तातडीने सुरू करा

Akola News : पीकविम्याबाबत शेतकऱ्यांच्या असंख्य अडचणी असताना कंपनीने गेल्या काही दिवसांपासून कार्यालयांना कुलूप लावून ठेवले आहे. परिणामी शेतकऱ्यांची अडचण होत असल्याने पीकविमा कंपनीने तातडीने कार्यालये पूर्ववत करावीत, अशी सूचना जिल्हा अधीक्षक कृषी अधिकारी शंकर किरवे यांनी विमा कंपनीच्या अधिकाऱ्यांना केली आहे.

या बाबत गुरुवारी (ता. ७) दिलेल्या पत्रात एचडीएफसी विमा कंपनीचे जिल्हा प्रतिनिधी सुनील भालेराव यांना पंतप्रधान पीकविमा योजनेअंतर्गत विमा कंपनीचे कार्यालय पूर्ववत सुरू करण्याचे सूचवले आहे.

विमा कंपनीने गेल्या महिन्यापासून पंतप्रधान पीकविमा योजनेअंतर्गत जिल्हा व तालुका स्तरावरील विमा कंपनीचे कार्यालये बंद केली असल्याबाबत पत्राद्वारे कळवले होते. तेव्हापासून ही कार्यालये कुलूप बंद ठेवली आहे.

पीकविमा योजनेमध्ये खरीप हंगामात शेतकऱ्यांनी सहभाग नोंदविला आहे. हवामानातील प्रतिकूल परिस्थिती या बाबीमध्ये विमा रक्कम अदा करण्यात आली आहे. त्यामधील विमा रक्कम प्रलंबित असलेल्या शेतकऱ्यांकडून सातत्याने कृषी विभागाकडे विचारणा केली जात आहे.

मोठ्या प्रमाणावर तक्रारी प्राप्त होत आहेत. शिवाय नोव्हेंबरमध्ये झालेल्या मॉन्सूनोत्तर पावसामुळे शेतकऱ्यांचे अतोनात नुकसान झाले आहे. अशा परिस्थितीत शेतकऱ्यांना येणाऱ्या अडचणीचे वेळेवर निराकरण होणे गरजेचे आहे. त्यासाठी कंपनीचे तालुका व जिल्हास्तरावरील कार्यालये त्वरित सुरू करण्यात यावी, असेही सूचवले आहे.

नकार कंपनीचा आणि म्हणे, संपर्क करा कृषी खात्याकडे

विमा कंपनीच्या कारभाराबाबत प्रश्‍नचिन्ह उपस्थित होत आहे. जिल्ह्यात काही शेतकऱ्यांच्या पूर्वसूचना विमा कंपनीमार्फत नाकारण्यात आल्या आहेत. कंपनीने शेतकऱ्यांची पूर्वसूचना नाकारली असताना शेतकऱ्यांना नजीकच्या कृषी विभागाशी संपर्क करा, असा संदेश देण्यात येत आहे.

वास्तविक पूर्वसूचना विमा कंपनीने नाकारली असल्यामुळे त्याबाबत कृषी विभागाकडे कुठलीही माहिती नाही. शेतकरी कृषी विभागात जाऊन अधिकाऱ्यांसोबत वादविवाद घालत आहेत. काही शेतकरी प्रतिनिधींनी कृषी विभागात अधिकाऱ्यांसोबत याविषयावरून हुज्जत घातली.

परिणामी विमा संदेशामध्ये कृषी विभागाशी संपर्क करा या ऐवजी नजीकच्या विमा कंपनी कार्यालय/विमा प्रतिनिधीशी संपर्क साधावा, अशी दुरुस्ती त्वरित करण्यात यावी असेही सुचवण्यात आले आहे.