Illegal Sand Mining : बेफाम वाळूउपशाने नदीकाठी टंचाई

Jalgaon News : गिरणा पट्ट्यासह ग्रामीण भागात नदीतून माती, वाळू यासारख्या गौणखनिजाची खुलेआमपणे वाहतूक केली जात असून, महसूल प्रशासनाने त्याकडे पूर्णपणे दुर्लक्ष केले आहे. ही समस्या वाढत असून, नदीकाठीदेखील टंचाई तयार होते. पर्यावरणविषयक नियमांचे पालन केले जाते की नाही, असा प्रश्‍नही ग्रामस्थ उपस्थित करीत आहेत.

गौणखनिजाची चोरट्या मार्गाने वाहतूक करणारे माफिया आणि त्यांचे दलाल मोकाट सुटले आहे. रात्रंदिवस वाळू, मातीची चोरी गिरणा, सुकी, तापी आदी नद्यांतून सुरू आहे. याबाबत जिल्हा प्रशासनाने लक्ष घालून गौणखनिज चोरट्या मार्गाने वाहतूक करणाऱ्यांविरोधात कारवाई करावी, अशी मागणी होत आहे.

कारण नदीत पाणी मुरत नाही. ते वाहून जाते. नदीत वाळू शिल्लक नाही. नद्यांना ओरबडण्यात आले आहे. यामुळे नदीत पाणी असूनही नदीकाठच्या शिवारातील विहिरी, कूपनलिकांना हवे तसे जलस्रोत नाही, कूपनलिका एप्रिलमध्येच नदीकाठी आटू लागतात, असेही शेतकऱ्यांचे म्हणणे आहे.

प्रशासनाच्या नाकावर टिच्चून गौणखनिजाची वाहतूक केली जात असतानाही त्याकडे पूर्णपणे दुर्लक्ष केले जात आहे. माती, वाळूची दिवसभर वाहतूक केली जात असताना, त्यास पायबंद घालण्यात महसूल प्रशासन असमर्थ ठरले आहे. जळगाव, एरंडोल, धरणगाव, भडगाव, पाचोरा, चाळीसगावसह अमळनेर, पारोळा, यावल, चोपडा, रावेर, मुक्ताईनगर आदी भागांत ही समस्या आहे.

अधिकाऱ्यांवरही हल्ले

धरणगाव, एरंडोल, जळगाव, यावल भागात महसूल कर्मचाऱ्यांवर प्राणघातक हल्ला केला होता. प्रशासनातील कर्मचाऱ्यांवर हल्ला केल्यानंतर वाळू वाहतूक बंद होईल, असा विश्‍वास होता. मात्र माती, वाळूची चोरट्या मार्गाने वाहतूक सुरूच आहे. स्थानिक तलाठी कोणतीही कारवाई यावर करीत नाहीत.

गिरणा नदीतून अनेक गावांत मागील ३० ते ३२ वर्षे वाळू उपसा बेफाम सुरू आहे. नदीत २० ते ३० फुटाचे खोल खड्डे आहेत. वाळूच काही गावांनजीक नदीत शिल्लक नाही. यामुळे नदीत पाणी थांबून ते जिरत नाही. ते गतीने वाहून जाते. यामुळे नदीकाठच्या गावांत व शिवारात टंचाई असते.