Illegal Seed Sale: अमरावतीत ‘एचटीबीटी’ने गुंडाळला ‘बीजी दोन’चा बाजार

Amravati News: कपाशीच्या तणनाशक सहनशील बीटी बियाण्याच्या (एचटीबीटी) प्रवेशाने कापसाच्या ‘बीजी दोन’ या वाणाच्या रिसर्च व्हरायटीचाही बाजार उठल्यात जमा झाला आहे. दरवर्षी जवळपास १५ लाख पाकिटांची होणारी उलाढाल यंदा थांबली असून, १५ मेपासून आतापर्यंत पूर्ण बाजारात १०० पाकिटे ही विकल्या गेली नसल्याचे कृषी केंद्र संचालकांनी सांगितले.

यंदाच्या खरिपात जिल्ह्यात २ लाख ४९ हजार ५०० हेक्टर क्षेत्रात कपाशीची लागवड अंदाजित करण्यात आली आहे. त्यासाठी १२ लाख ४७ हजार ५०० बीजी दोन या वाणाच्या पाकिटांची मागणी कृषी विभागाने केली आहे. त्यांना शेतकऱ्यांकडून मागणी नसल्याचे विक्रेत्यांनी सांगितले.

यंदाच्या खरीप हंगामात गुजरातमधून जिल्ह्यात प्रतिबंधित एचटीबीटी बियाण्यांचा मोठ्या प्रमाणावर तस्करीने पुरवठा झाला आहे. महिनाभरात कृषी विभागाच्या पथकाने ४३.८२ लाख रुपयांची ४ हजार २८६ पाकिटे एचटीबीटी बियाणे जप्त केले आहे. तथापि, जिल्ह्यात एकूण मागणीच्या ८५ टक्के साठा एचटीबीटी बियाणे उपलब्ध झाला असल्याची माहिती समोर आली आहे. जवळपास सर्वच शेतकऱ्यांपर्यंत हे बियाणे पोहोचले असल्याचा अंदाज शिवणगाव येथील शेतकरी गजानन खरबडे यांनी वर्तविला.

त्याचा एकूणच परिणाम दरवर्षी मागणी असलेल्या बीजी दोन वाणाच्या बियाण्यांच्या विक्रीवर पडून ती यंदा ठप्प झाली आहे. १५ मेपासून आतापर्यंत दहा पाकिटे विकल्या गेल्याचे सतीश अॅग्रो सेंटरचे संचालक चेतन सोनी यांनी सांगितले. तथापि, नामांकित कंपन्यांच्या बियाण्यांना मागणी असून ही त्या बियाण्यांचा सध्या तुटवडा असल्याचेही ते म्हणाले.

दामदुप्पट भावाने विक्री

‘बीजी दोन’ बियाण्यांची किंमत प्रति पाकिट ९०१ रुपये आहे. त्या तुलनेत एचटीबीटीची एका पाकिटाची किंमत १४०० ते १५०० रुपये आहे. तस्करांना या बियाण्यांच्या विक्रीत नफा अधिक असल्याने रिस्क घेऊन विक्री सुरू आहे. नियंत्रणासाठी यंत्रणा कमी पडत आहे.