Farmer Compensation Scam : अनुदानाचा मलिदा लाटणाऱ्यांवर गुन्हे

Jalna News : शेतकऱ्यांना अतिवृष्टी व गारपिटीची नुकसान भरपाई म्हणून मंजूर झालेल्या अनुदान वाटपात ७९ कोटींपैकी तब्बल ४२ कोटींचा अपहार उघडकीस आला. दरम्यान, आता या प्रकरणातील दोषी अधिकारी व कर्मचाऱ्यांवर लवकरात लवकर गुन्हे दाखल करण्याचे निर्देश महसूल मंत्री चंद्रशेखर बावनकुळे यांनी जिल्हाधिकाऱ्यांना दिले आहेत.

त्यानुसार ५७ महसूल कर्मचारी, १७ ग्रामसेवकांसह २ कृषी सहायकांवर गुन्हे दाखल होणार असल्याची माहिती सूत्रांनी दिली. महसूल मंत्री बावनकुळे शुक्रवारी (ता. ९) शासकीय कार्यक्रमासाठी जिल्ह्यात आले होते.

यावेळी त्यांनी रात्री उशिरा जिल्हाधिकाऱ्यांसह उच्चपदस्थ अधिकाऱ्यांची बैठक घेतली. या बैठकीत त्यांनी शेतकऱ्यांच्या भावनेशी कुणी खेळू नये. या प्रकरणात कुणीही दोषी असले तरी त्याची गय केली जाणार नसल्याचे सांगितले.

जिल्ह्यात २०२२ ते २०२४ या कालावधीत अतिवृष्टी, पूर व गारपिटीमुळे शेतकऱ्यांचे मोठे नुकसान झाले होते. दरम्यान, घनसावंगी व अंबड तालुक्यात नुकसानीच्या भरपाईपोटी मंजूर झालेल्या अनुदान वाटपात तहसीलदारांचे लॉगिन आयडी व पासवर्डचा गैरवापर करून तलाठ्यांसह महसूलचे कर्मचारी, ग्रामसेवक आणि कृषी सहायकांनी अनुदान हडपल्याचे उघडकीस आले.

मात्र एक महिना उलटूनही या प्रकरणी गुन्हे दाखल झाले नाही. आता पुढील आठवड्यात गुन्हे दाखल करण्याच्या प्रक्रियेला अधिक वेग येणार असल्याची माहिती सूत्रांनी दिली. या प्रकरणात १७ तलाठी आणि ४ महसूलचे कर्मचारी असे एकूण २१ जण आधीच निलंबित झाले आहेत. तर ३६ तलाठ्यांची विभागीय चौकशी प्रस्तावित आहे. तसेच १७ ग्रामसेवक आणि २ कृषी साहाय्यकही दोषी आढळले आहेत.