Pune Heavy Rain: पुणे जिल्ह्यात पावसाचा जोर वाढला

Pune News: पुणे जिल्ह्यातील धरणक्षेत्रात पावसाचा जोर पुन्हा काही प्रमाणात वाढला आहे. मागील दोन दिवसांपासून पश्चिम पट्ट्यातील धरण क्षेत्रात पावसाची संततधार सुरू आहे. मुठा खोऱ्यातील धरणक्षेत्रात पावसाच्या जोरदार सरी बरसत आहेत. गुरुवारी (ता. २४) सकाळी आठ वाजेपर्यंत मुळशी धरणक्षेत्रात सर्वाधिक ६७ मिलिमीटर पाऊस पडल्याची नोंद झाली. या पावसामुळे मागील चोवीस तासांमध्ये १.८१ टीएमसी एवढ्या पाण्याची नव्याने आवक झाली आहे.

गेल्या पंधरा दिवसांपासून पावसाने काहीशी उघडीप दिली होती. तर जिल्ह्यात ढगाळ वातावरणाची स्थिती कायम होती. घाटमाथ्यावर अधूनमधून तुरळक सरी कोसळत होत्या. त्यामुळे धरणांतून सोडण्यात आलेला विसर्ग काही प्रमाणात कमी करण्यात आला होता. आतापर्यंत झालेल्या पावसामुळे जिल्ह्यातील एकूण असलेल्या २६ धरणांत सुमारे १६१.७९ टीएमसी म्हणजेच ८१ टक्के पाणीसाठा झाला होता.

मात्र, मागील दोन ते तीन दिवसांपासून पुन्हा पावसासाठी पोषक वातावरण तयार झाले आहे. यामुळे घाटमाथ्यावर पावसाच्या सरी कोसळत आहेत. प्रामुख्याने लोणावळा घाटमाथ्यावर ५१ मिलिमीटर पाऊस पडला असून शिरोटा ३९, कुंडली ३३, वळवण ३८, ठोकरवाडी २० मिलिमीटर पाऊस पडला.

गुरुवारी (ता. २४) दिवसभर या भागात पावसाच्या बऱ्यापैकी सरी कोसळत होत्या. मुठा खोऱ्यातील टेमघर धरणक्षेत्रात २२ मिलिमीटर पाऊस पडला. तर वरसगाव १५, पानशेत १६ मिलिमीटर पाऊस पडला असून खडकवासला धरणक्षेत्रात तुरळक सरी पडल्या. नीरा खोऱ्यातील वडिवळे धरण क्षेत्रात ४१ मिलिमीटर, पवना ३१, आंध्रा २४, गुंजवणी २०, भामा आसखेड ११ मिलिमीटर पाऊस पडला.

तर कासारसाई, कळमोडी, चासकमान, नाझरे, भाटघर, वीर धरणक्षेत्रात तुरळक सरी बरसल्या. कुकडी धरण क्षेत्रातील पिंपळगाव जोगे, माणिकडोह, येडगाव, वडज, डिंभे, चिल्हेवाडी, घोड आणि भीमा खोऱ्यातील उजनी या धरणक्षेत्रात पावसाचा शिडकावा झाला. आतापर्यंत झालेल्या पावसामुळे अनेक धरणातील पाणीसाठा ७५ टक्केहून अधिक झाला आहे. तर चार धरणे शंभर टक्के भरली असून आवक सुरू असल्याने नद्यांना विसर्ग सोडण्यात आला आहे.

भात खाचरे भरली

पावसामुळे भात खाचरे चांगलीच प्रवाही झाली आहेत. तर भात लागवडी केलेल्या शेतकऱ्यांना दिलासा मिळाला असून अनेक ठिकाणी भात लागवडी वेगात सुरू आहेत. काही ठिकाणी भात लागवड केलेल्या रोपांची वाढीसाठी हा पाऊस पोषक असल्याने वाढही चांगली आहे.