Pune Monsoon Rain: पावसाचा जोर कायम; शेतीपिकांत पाणी तुंबले

Pune News: मॉन्सून दाखल झाल्यानंतर पावसाने चांगलाच दणका दिला आहे. जिल्ह्यात पावसाचा जोर अजूनही कायम आहे. मंगळवारी (ता. २७) सकाळी आठ वाजेपर्यंत मावळातील कार्ला, खडकाळा येथे ९४ मिलिमीटर पाऊस पडल्याची नोंद झाली. त्यामुळे शेतात पाणीच पाणी तुंबले. अनेक ठिकाणी टोमॅटो, कांदा, कडवळ, भुईमूग पिके पाण्याखाली गेल्यामुळे पिके कुजवण्याच्या स्थितीत आहे. तर बारामती, इंदापूर, दौंड भागासह नुकसान झालेल्या ठिकाणी पंचनामे सुरू झाले आहे.

सध्या जिल्ह्यात अनेक ठिकाणी कमीअधिक पाऊस होत आहे. राजगड तालुक्यातील वेल्हा, पानशेत, विंझर, आंबवणे मंडलांत तुरळक सरी पडल्या. तर जुन्नरमधील नारायणगाव, जुन्नर, आंबेगावमधील घोडेगाव, कळंब, मंचर, बारामतीतील माळेगाव, पणदरे, वडगाव, बारामती, सुपा, पुरंदरमधील सासवड, भिवंडी, जेजुरी, शिवरी, शिरूरमधील वडगाव येथे हलक्या सरी बरसल्या. तर उर्वरित ठिकाणी मध्यम ते जोरदार पाऊस झाला.

पूर्व भागात मॉन्सूनच्या पावसाने जोरदार हजेरी लावली. धुवाधार पडणाऱ्या अवकाळी पावसामुळे अनेक ठिकाणी शेतीचे बांध फुटून शेतकऱ्यांचे नुकसान झाल्याचे दिसून आले. गेली आठ ते दहा दिवसांपासून पडत असलेल्या या पावसामुळे ओढे तुडुंब भरून वाहू लागले असून कित्येक शेतकऱ्यांनी नुकतीच लागवड केलेल्या तरकारी पिकांचे नुकसान झाले आहे. शिरूरच्या बेट भागातील काठापूर खुर्द, पिंपरखेड, जांबुत, शरदवाडी, फाकटे, चांडोह, वडनेर खुर्द, टाकळी हाजी या परिसरातील मोठ्या प्रमाणात उसाची लागवड होत असते.

मे, जून महिन्याच्या हंगामात होत असलेल्या ऊस लागवडीला मागील आठवडाभरातील पडत असलेल्या अवकाळी पावसामुळे खोडा घातल्याचे दिसून येत आहे. अनेक ठिकाणी या पावसामुळे जमिनीत पाण्याचे उपवळ वाहू लागले आहेत. अशा प्रकारच्या जमिनीत लागवड केलेली उसाची रोपे खराब होऊन जाण्याची शक्यता नाकारता येत नाही. हा पाऊस सुरू राहिला तर शेतातील कायमच्या ओलाव्यामुळे शेतकऱ्यांना ऊस पिकाची लागवड करता येणे शक्य होणार नाही.

मंगळवारी (ता.२७) सकाळी आठ वाजेपर्यंत तालुक्यातील मंडलनिहाय पडलेला पाऊस (स्रोत : कृषी विभाग)

हवेली : पुणे वेधशाळा, केशवनगर ३९, कोथरूड, खडकवासला २६, थेऊर ३७, उरुळी कांचन २४, खेड १२, भोसरी ५९, चिंचवड ४६, कळस ७१, वाघोली ३८, अष्टापूर ३०.

मुळशी : पौड, घोटावडे ५६, थेरगाव ३९, माले ५३, मुठे ५४, पिरंगुट, कासार आंबोली, सावरगाव ५६, कोळवण ८५, माण ५३.

भोर : किकवी १२, वेळू १८.

मावळ : वडगाव मावळ, तळेगाव ३२, काले ७१, कार्ला, खडकाळा ९४, लोणावळा ६७, शिवणे, परिंदवाडी ५३, टाकवे, वाडेश्वर ४७, कुसगाव ६७, टाकवे खु. ९४.

जुन्नर : वडगाव आनंद २३, निमगाव सावा, बेल्हा ४५, राजूर २२, डिंगोरे २१, आपटाळे २२, ओतूर १९, वडज १४, ओझर १९

खेड : वाडा २८, राजगुरुनगर ४१, कुडे, पाईट २८, चाकण ४६, आळंदी ७२, पिंपळगाव ३२, कन्हेरसर ५१, कडूस ३६, वेताळे २८, करंजविहिरे ६९,

आंबेगाव : पारगाव ३०, निरगुडसर २५.

शिरूर : टाकळी ३५, न्हावरा ६४, मलठण ३५, तळेगाव ४१, रांजणगाव ३५, कोरेगाव ४९, पाबळ ५१, शिरूर ३३, निमोणे ६४.

बारामती : लोणी २१, मोरगाव ३९, उंडवडी २२, शिर्सुफळ ३२.

इंदापूर ः भिगवण ४८, इंदापूर ५५, लोणी ४५, बावडा ४६, काटी, निमगाव ५३, अंथुर्णी ४६, पळसदेव ४५, लाखेवाडी ५१.

दौंड : देऊळगाव ३४, पाटस ४०, यवत २३, कडेगाव २४, राहू ३८, वरवंड ४०, रावणगाव ४५, दौंड ४०, बोरी बु २५, खामगाव २६, वडगावबांदे २३, पारगाव ६४, बोरीपार्धी २५, गिरीम ४०, कुरकुंभ ३२.

पुरंदर : कुंभारवळण २९, परिंचे २२, राजेवाडी २५, वाल्हा २२.