Fodder Cultivation : गायरान जमिनीवर चारा लागवड प्रकल्पाला सुरुवात

Nanded News : उमरी तालुक्यातील जिरोना येथे गायरान जमिनीवर महात्मा गांधी राष्ट्रीय ग्रामीण रोजगार हमी योजनेअंतर्गत चारा लागवड प्रकल्पाची सुरुवात कै. वसंतराव नाईक शेती स्वावलंबन मिशनचे अध्यक्ष ॲड. नीलेश हेलोंडे पाटील यांच्या करण्यात आली. जिल्ह्यात रोहयोअंतर्गत शंभर एकरांवर चारा पिकाची लागवड होणार आहे.

दुष्काळ व चारा टंचाईमुळे विदर्भ व मराठवाड्यामध्ये दूग्ध व्यवसायाला मोठी अडचण निर्माण होत आहे. शेतकरी आत्महत्या रोखण्यासाठी दूध व्यवसाय हा महत्त्वाचा असल्याचे अनेक अभ्यासामध्ये दिसून आलेले आहे. मराठवाड्यात नांदेड जिल्ह्यामध्ये दुग्ध व्यवसायाला मोठा वाव आहे. परंतु चाऱ्याच्या अडचणी असल्यामुळे शेतकरी जोड व्यवसाय करु शकत नाहीत. परिणामी या जिल्ह्यात शेतकरी आत्महत्या दिसून येत आहेत.

यावर मात करण्यासाठी कै. वसंतराव नाईक शेती स्वावलंबन मिशन राज्यात काम करीत आहे. यासाठी प्रत्येक गावात उपलब्ध असलेल्या गायरान जमिनीमध्ये सुपर नेपियर सारखा चारा लावून तो गावातील पशुधनास मोफत मिळाला तर अल्पभूधारक शेतकऱ्यांचा तसेच भूमिहीन मजूरही मोठ्या प्रमाणात दूध व्यवसाय करू शकतील.

शेतकऱ्यांना पिकाचा पैसा हातात येण्यासाठी किमान १२० दिवस लागतात तर दुधाचा पैसा दर दहा दिवसाला खात्यामध्ये येऊ शकतो. त्यामुळे शेतकऱ्यांनी हा प्रकल्प आपला स्वतःचा समजून या प्रकल्पात योगदान द्यावे व आपल्या पशुधनासाठीचा आवश्यक चारा आपल्या गावातील गायरानातच उगवावा व दूध व्यवसायातून आर्थिक दृष्ट्‌या समृद्ध व्हावे असे प्रतिपादन ॲड. निलेश हेलोंडे पाटील यांनी केले.

नांदेड जिल्ह्यामध्ये गायरान जमिनीमध्ये चारा लागवड करण्यासाठी १०० एकरचे उद्दिष्ट ठेवल्याचे संजीव मोरे यांनी सांगितले. यावेळी वसंतराव नाईक शेती स्वावलंबन मिशनचे के. डी. देठे, उपजिल्हाधिकारी (रोहयो) संजीव मोरे, जिल्हा पशुसंवर्धन उपायुक्त डॉ. राजकुमार पडिले, जिल्हा पशुसंवर्धन अधिकारी डॉ. प्रवीणकुमार घुले, डॉ. रोहित धुमाळ, प्रशांत थोरात, उमरी तहसीलदार डॉ. श्रीनिवास जिंकलोड, पशुधन विकास अधिकारी, वनविभागाचे दिनकर पाटील उपस्थित होते.