Agriculture Reforms: कृषी सुधारणांबाबतची राज्यपालांनी घेतली माहिती

Pune News: राज्यातील कृषी शिक्षण व संशोधन तसेच पणन सुधारणांबाबत विविध समित्यांकडून झालेल्या अभ्यास अहवालाची माहिती राज्यपाल सी. पी. राधाकृष्णन यांनी घेतली. महाराष्ट्र कृषी तंत्रज्ञ संस्थेचे (आयमॅट) प्रतिनिधी तसेच कृषी क्षेत्रातील काही तज्ज्ञांसोबत राज्यपालांची एक बैठक राजभवनात नुकतीच झाली.

माजी कृषी आयुक्त उमाकांत दांगट, माजी कुलगुरू डॉ. व्यंकट मायंदे व राजाराम देशमुख तसेच राज्य लोकसेवा आयोगाचे माजी अध्यक्ष मधुकर कोकाटे, माजी कृषी संचालक डॉ. सुदाम अडसूळ व सुभाष जाधव या वेळी उपस्थित होते. या वेळी ‘आयमॅट’ची स्थापना, उद्दिष्टे, उपक्रम व भविष्यकालीन दिशा याविषयी सादरीकरण करण्यात आले.

‘‘राज्य शासनाचा कृषी व इतर संलग्न विभाग, पशू व मत्स्य विज्ञान विद्यापीठासह सर्व कृषी विद्यापीठांच्या समन्वयाने आम्ही कार्य करण्यास उत्सुक आहोत. या समन्वयातून शाश्वत शेतीच्या नियोजनाची बांधणी होईल व त्याचे लाभ शेतकऱ्यांना मिळतील,’’ असे ‘आयमॅट’चे समन्वयक डॉ. मायंदे यांनी राज्यपालांना सांगितले.

महाराष्ट्र कृषी शिक्षण व संशोधन परिषदेच्या कामकाजाचे पुनर्विलोकन करण्यात आल्याचे या वेळी माजी कुलगुरू डॉ. राजाराम देशमुख यांनी चर्चेत सांगितले. पुनर्विलोकन अहवालाची प्रत राज्यपालांना देतानाच अहवालाच्या अंमलबजावणीचे महत्त्व डॉ. देशमुख यांनी स्पष्ट केले. माजी कृषी आयुक्त डॉ. उमाकांत दांगट यांनी राज्यपालांना विविध अहवालांचे निष्कर्ष सांगितले.

यात राज्यातील कृषी पणन व्यवस्थेचा अभ्यास व सुधारणा, महसूल कार्यालयांची पुनर्रचना, महसूल कायद्यांचे पुनर्विलोकन यासंबंधी समित्यांनी तयार केलेल्या अहवालांचा समावेश होता. चर्चेअंती राज्यपाल म्हणाले, की कृषी विकासासाठी आयमॅट, कृषी विभाग व विद्यापीठांनी एकत्रित प्रयत्न करणे गरजेचे आहे. त्यासाठी योग्य ती पावले उचलली जातील.