Milk Adulteration: दूध भेसळ रोखण्यासाठी लवकरच नवीन कायदा: दुग्धविकासमंत्री अतुल सावे

Milk Safety: राज्यात दूध भेसळ रोखण्याससाठी लवकरच नवा कायदा आणला जाईल, अशी माहिती राज्याचे दुग्धविकासमंत्री अतुल सावे यांनी दिली आहे. राज्यातील दूध भेसळीवर मंत्रालयात बुधवारी (ता.१८) बैठक झाली. या बैठकीत मंत्री सावे यांनी १५० दिवसांच्या आराखाड्याचा आढावा घेतला.

यावेळी दुग्धविकास विभागाचे सचिव डॉ. रामास्वामी एन., महानंदचे व्यवस्थापकीय संचालक अनिल हातेकर यांच्यासह राज्यातील प्रमुख दूध संघांचे प्रतिनिधी (दूरदृश्य प्रणालीद्वारे) तसेच विभागाचे वरिष्ठ अधिकारी उपस्थित होते.

या बैठकीत दूध संघाच्या प्रतिनिधींनी अनेक सूचना केल्या. यामध्ये राज्यात दुधाला समान दर, एक राज्य एक ब्रँड, एक जिल्हा एक दूध संघ तसेच एक गाव एक दूध संस्था स्थापन करण्याची मागणी प्रतिनिधींनी केली. त्यावर सकारात्मक निर्णय घेण्यात येईल, असं मंत्री सावे यांनी सांगितलं.

मुंबईतील आरे स्टॉलचे अत्याधुनिकरण करण्यात येईल. दिवसातून दोन वेळा दूध संकलन करण्याची मागणी पूर्ण करण्याबाबत विचार करण्यात येईल. तसेच दूध संकलनासाठी शेतकरी प्रोड्युसर कंपन्याची मदत घेण्याबाबत निर्णय घेतला जाईल. महानंदद्वारे अधिकाधिक दूध संकलन वाढवण्यासाठी प्रयत्न करण्याची सूचना मंत्री सावे यांनी दिली.

दरम्यान, राज्यात दूध भेसळ मोठ्या प्रमाणात वाढली आहे. दूध भेसळीमुळे ग्राहकांच्या आरोग्याला धोका निर्माण झाला आहे. त्यामुळे दूध भेसळ करणाऱ्यांवर कडक कारवाई करावी, अशी मागणी ग्राहकांकडून केली जात आहे.