Shaktipeeth Highway : शक्तिपीठ महामार्गाचे काम सुरू करा

Mumbai News : राज्यातील १२ जिल्ह्यांतील शेतकऱ्यांचा विरोध झुगारून शक्तिपीठ महामार्गाचे काम सुरू करण्याचा निर्णय राज्य सरकारने घेतला आहे. संबंधित शेतकऱ्यांना विश्वासात घेऊन तातडीने प्रक्रिया सुरू करा, असे निर्देश सोमवारी (ता. १३) सार्वजनिक बांधकाम विभागाच्या १०० दिवस आढावा बैठकीत मुख्यमंत्री देवेंद्र फडणवीस यांनी दिले.

महाराष्ट्र रस्ते विकास महामंडळ हा विभाग उपमुख्यमंत्री एकनाथ शिंदे यांच्याकडे येत असला तरी ते या बैठकीला अनुपस्थित होते. शिंदे मुख्यमंत्री असताना हा महामार्ग रद्द करू, आरेखनात बदल करू अशी आश्वासने ठिकठिकाणच्या शेतकऱ्यांना दिले होते. त्यामुळे शिंदे यांच्या अनुपस्थितीत मुख्यमंत्री फडणवीस यांनी आदेश दिले आहेत.

राज्यातील दळणवळण सुविधा तसेच व्यावसायिक संधी त्याचसोबत पर्यटनाला व्यापक प्रमाणात गती देणाऱ्या शासनाच्या महत्त्वाकांक्षी शक्तिपीठ महामार्गाच्या कामाचे नियोजन सर्वांना विश्वासात घेऊन तत्परतेने काम सुरू करावे, असे निर्देश देण्यात आले आहेत.

मुख्यमंत्री फडणवीस यांनी राज्यातील महामार्गाची उभारणी तसेच रस्त्यांचे जाळे दर्जेदार आणि अधिक व्यापक करण्याची गरज आहे. त्यादृष्टीने सार्वजनिक बांधकाम विभागाने नियोजन करावे. राज्यातील धार्मिक स्थळांना जोडणारा आणि पर्यटन उद्योग व्यवसायाला प्रोत्साहन देणारा शक्तिपीठ महामार्गाची उभारणी ही दर्जेदार आणि गतिमानतेने करा त्यासाठीच्या प्रक्रीया तातडीने सुरू करा, असे निर्देश दिले.

‘समृद्धीचा अंतिम टप्पा फेब्रुवारीअखेर खुला करा’

फडणवीस पुढे म्हणाले, ‘समृद्धी महामार्गाचे उर्वरित अंतिम टप्प्याचे आमणे पर्यंतचे ७६ कि.मी. लांबीचे काम तातडीने पूर्ण करुन फेब्रुवारीपर्यंत हा महामार्ग पूर्णपणे खुला करा. तसेच यावर्षी समृद्धी महामार्गाचे कर्ज रोखे प्रक्रिया पूर्ण करण्यात यावी.

प्रवाशांना उपयुक्त ठरणाऱ्या मुंबई पुणे द्रुतगती मार्गावरील १३.३० कि.मी. मिसिंग लिंकचे काम ही गतीने पूर्णत्वास न्यावे. त्याचप्रमाणे नाशिक -मुंबई या महत्त्वाच्या राष्ट्रीय महामार्गाचे सुधारणा करण्याचे काम ही तातडीने पूर्ण करावे. तसेच मंत्रालय परिसरात नवीन सात मजली इमारतीची उभारणी कामाची सुरुवात येत्या १०० दिवसांत करण्याचे सूचित केले.

बैठकीस सार्वजनिक बांधकाम मंत्री शिवेंद्रसिंह भोसले, शालेय शिक्षण मंत्री दादा भुसे, पर्यटन मंत्री शंभूराज देसाई सार्वजनिक बांधकाम विभागाच्या अपर मुख्य सचिव मनीषा म्हैसकर, सचिव सदाशिव साळुंखे, महाराष्ट्र राज्य रस्ते विकास महामंडळ व्यवस्थापक अनिल गायकवाड यांच्यासह संबंधित अधिकारी उपस्थित होते.

‘झाडे लावताना दक्षता घ्या’

रस्त्यांच्या दुतर्फा वृक्ष लागवड करताना भविष्यातील रस्ता विस्तारीकरणाची निकड लक्षात घेऊन वृक्षसंगोपन करणात यावे, असे निर्देशही बैठकीत देण्यात आले. अत्याधुनिक तंत्रज्ञानाचा वापर करुन दर्जेदार आणि गतिमान कामे करण्याच्या दृष्टीने नियोजन करण्याचे निर्देशही मुख्यमंत्री देवेंद्र फडणवीस यांनी दिले.