Farmer Loan Waiver: कर्जमाफीबाबत सरकारकडून शेतकऱ्यांचा विश्वासघात

Pune News: विधानसभेच्या निवडणुकीच्या पार्श्वभूमीवर सत्ताधाऱ्यांनी शेतकऱ्यांना संपूर्ण कर्जमाफीचे आश्वासन देऊन मते मिळविली. आज मात्र राज्याची आर्थिक परिस्थिती पाहता कर्जमाफी करता येणार नाही, अशी विधाने केली जात आहेत.

सरकारने केलेला शेतकऱ्यांचा हा पुन्हा एकदा नवा विश्वासघात आहे, असा आरोप करीत सरकारने निवडणुकीत शेतकऱ्यांना दिलेले आश्वासन पाळावे व शेतकऱ्यांची संपूर्ण कर्जमाफी करावी,

अशी मागणी पत्रकाद्वारे किसान सभेचे डॉ. अशोक ढवळे, जे. पी. गावीत, उमेश देशमुख, डॉ. अजित नवले यांनी केली आहे. माणसाने अंथरूण पाहून पाय पसरावे, शेतकऱ्यांची कर्जमाफी करावी इतके मोठे अंथरूण राज्य सरकारचे सध्या नाही, असे विधानही राज्याचे उपमुख्यमंत्री व अर्थमंत्री अजित पवार यांनी केलेले आहे.

शेतकऱ्यांची कर्जमाफी करण्याएवढे मोठे अंथरूण राज्य सरकारचे नव्हते याची जाणीव निवडणुकीत शेतकऱ्यांना आश्वासन देऊन मते पदरात पाडून घेतेवेळी नव्हती का, असा प्रश्न या पार्श्वभूमीवर उपस्थित होत आहे.

मते मागत असताना आपले अंथरूण किती आहे, तितकीच आश्वासने द्यावीत, असे का वाटले नाही, हा प्रश्न शेतकरी समुदायातून विचारला जात आहे. या वर्षी व पुढील वर्षी तरी कर्जमाफीची शक्यता नाही, शेतकऱ्यांची परिस्थिती पाहून कालांतराने कर्जमाफीचा निर्णय घेऊ, असेही अजित पवार यांनी सांगितले आहे. त्यामुळे शेतकऱ्यांच्या जिवाशी होत असलेला खेळ थांबवावा, असे आवाहन किसान सभा करत आहे.