Cow Tourism: कृषी महाविद्यालयाच्या देशी गोपालन केंद्रात गौ पर्यटन

Pune News: पुणे कृषी महाविद्यालयाच्या मरीआई गेट येथील पशुसंवर्धन व दुग्धशास्त्र विभागामध्ये देशी गाय संशोधन व प्रशिक्षण केंद्राने गौ पर्यटनाची संधी उपलब्ध करून दिली आहे.

देशी गाय संशोधन व प्रशिक्षण केंद्राने भारतातील दुधासाठी प्रसिद्ध असणाऱ्या साहिवाल, गीर, लाल सिंधी, थारपारकर व राठी या पाचही गोवंशांच्या जातिवंत गाई व वळूचे कळप येथे आहेत. याशिवाय या केंद्रावर महाराष्ट्रातील खिलार, कोकण कपिला, डांगी, देवणी, लाल कंधारी व गौळाऊ या गाईंच्या जातींबरोबरच आंध्र प्रदेशातील लहान आकाराकरिता प्रसिद्ध असणारी पुंगनूर व मिनीएचर पुंगनूर या गायीदेखील आहेत.

गौ पर्यटनाच्या दरम्यान सहभागी पर्यटकांना देशी गोवंशांचे महत्त्व, त्यांचे वर्गीकरण व उपयुक्तता, देशी गाय संशोधन व प्रशिक्षण केंद्राची उद्दिष्टे, चालू असलेले संशोधन व इतर कार्याविषयी माहिती दिली जाते. या शिवाय पर्यटकांना येथील शाश्‍वत देशी गोपालनाचे मॉडेल, दूध, गोमय व गोमूत्र प्रक्रिया करण्याचे एकात्मिक मॉडेल, गोबरगॅस व सौरऊर्जा प्रणाली व गायींच्या उपचाराकरिता आवश्यक वनस्पतींचे संग्रहालय देखील इथे पाहावयास मिळते.

भारतातील ११ देशी गोवंश एका ठिकाणी पाहण्याची व माहिती करून घेण्याची संधी येथे उपलब्ध आहे. या केंद्रावर गौ पर्यटनाच्या दरम्यान काऊ कडलिंग थेरपीचा लाभ देखील पर्यटकांना घेता येतो. देशी गाय संशोधन व प्रशिक्षण केंद्रातील गौ पर्यटन उपक्रम सशुल्क आहे.