Ujani Dam: उजनी धरणातून भीमा नदीत

Solapur News: उजनी धरणातून भीमा नदीत सोडण्यात आलेल्या विसर्गामुळे पंढरपुरात ऐन आषाढी वारीच्या तोंडावर पूरस्थितीची शक्यता होती. त्यामुळे ही संभाव्य पूरपरिस्थिती टाळण्यासाठी उजनी धरणातून भीमेतील विसर्ग मागच्या आठवड्यात बंद करण्यात आला.

त्यानंतर आता वारी संपल्यानंतर उजनीतून भीमा नदीत मंगळवारपासून (ता. ८) पुन्हा १० हजार क्युसेक इतका विसर्ग सोडण्यास सुरुवात करण्यात आली. मागच्या काही दिवसांत उजनी धरणाच्या पाणलोट क्षेत्रातील सततच्या पावसामुळे वरच्या धरणांकडून अतिरिक्त पाणी उजनी धरणात पाणी सोडण्यात येत आहे.

पण आषाढी वारीचा मोठा सोहळा पंढरपुरात होतो. चंद्रभागेच्या वाळवंटात दीड ते दोन लाख भाविक मावतात, या सोहळ्यात नदीतील स्नानाला विशेष महत्त्व असल्याने नदीत मोठी गर्दी होणार हे लक्षात घेऊन, नदी पात्रामध्ये १५ ते २० हजार क्युसेकपर्यंत पाण्याचा विसर्ग राहिल्यास वाळवंटात वारकऱ्यांना थांबता येणार नाहीच,

पण पुराचा संभाव्य धोका लक्षात घेऊन, पाण्याचा विसर्ग वारीच्या आधीच टप्प्या-टप्प्याने सोडून धरणातील पाणी नियंत्रणात ठेवण्याचा प्रयत्न करण्यात आला.त्यानंतर पुढे वारीच्या तोंडावर हा विसर्ग पूर्णपणे थांबवून आता वारीची गर्दी मोकळी झाल्यानंतर पुन्हा विसर्ग सुरू करण्यात आला. परिणामी प्रशासनाच्या योग्य नियोजनामुळे वारीत पुराचा अडथळा टळला.

दरम्यान, मंगळवारी (ता. ८) उजनी धरणाच्या वरच्या पाणलोट क्षेत्रातून धरणाकडे २० हजार १६७ क्युसेक इतका विसर्ग सुरू आहे. तर धरणातून पुढे भीमा नदीत १० हजार क्युसेक सुरू करण्यात आला आहे.

‘उजनी’ची पातळी ८७ टक्क्यांवर

उजनी धरणाच्या पाणलोटक्षेत्राकडून येत असलेल्या विसर्गामुळे धरणाच्या पाणीपातळीने शंभर टीएमसीची पातळी या आधीच ओलांडली आहे. मंगळवारी (ता. ८) धरणात एकूण पाणीपातळी ४९६.२६० मीटरपर्यंत राहिली. तर पाण्याचा एकूण साठा ११०.६३ टीएमसी आणि त्यापैकी उपयुक्त साठा ४६.९७ टीएमसी एवढा राहिला. तर या पाण्याची टक्केवारी ८७.६८ टक्के इतकी राहिली.