Anjangaon Surji APMC: अंजनगावसूर्जी बाजार समिती सभापती, प्रभारी सचिवावर गुन्हा

Amravati News: बाजार समितीच्या माजी सचिवाचा मोबाईल हिसकावत शिवीगाळ करीत जीवे मारण्याची धमकी दिल्याप्रकरणी सभापतीसह प्रभारी सचिव, संचालकावर गुन्हा दाखल करण्यात आला. दुसरीकडे संबंधित माजी सचिवाच्या कार्यकाळातील गैरव्यवहाराची चौकशी सुरू असल्याने त्या आकसातून ही तक्रार केल्याचा आरोप अंजनगावसूर्जी बाजार समितीच्या संचालक मंडळाने केला आहे. 

अंजनगावसूर्जी बाजार समितीत २०२३ मध्ये सध्याच्या संचालक मंडळाने पदभार स्वीकारला. त्यावेळी अंकेक्षण अहवाल (ऑडिट रिपोर्ट) व ताळेबंदाची पडताळणी केली असता त्यात मोठ्या रक्‍कमेची तफावत आढळून आल्याचा दावा सभापती जयंत साबळे यांनी केला. त्यामुळेच सुरुवातीला सभापती व त्यानंतर संचालक शंकर चोरे यांच्या माध्यमातून तत्कालीन सचिव गजानन नवघरे (वय ४९) यांच्या कार्यकाळातील व्यवहाराच्या चौकशीस सुरुवात करण्यात आली.

संबंधित सचिवाला या संदर्भाने नोटीस बजावण्यात आली. त्यानंतर लवकरच या प्रकरणात जबाब देखील नोंदविण्यात येतील. हे सारे सुरू असतानाच बाजार समितीचे माजी सचिव गजानन नवघरे यांनी सभापती जयंत साबळे व प्रभारी सचिव अमर साबळे, संचालिका पूनम पोटे यांचे पती अमोल पोटे तसेच संचालक शंकरराव चोरे यांनी त्यांचा मोबाईल बळजबरीने हिसकावत शिवीगाळ करीत जीवे मारण्याची धमकी दिल्याचा आरोप केला. 

या विषयी त्यांनी अंजनगावसूर्जी पोलिसांत तक्रार दिली. त्याआधारे पोलिसांनी चारही जणांविरोधात भारतीय न्याय संहितेच्या विविध कलमान्वये गुन्हा दाखल केला आहे. मोबाईल जप्त केल्यानंतर त्याचे स्क्रीन लॉक उघडण्यासोबतच जप्ती पंचनाम्यावर सही करण्यासाठी देखील उभयतांनी दबाव टाकल्याचे देखील तक्रारीत नमूद आहे. बाजार समितीत घडलेल्या या घटनेने सर्वदूर एकच खळबळ उडाली आहे.

तत्कालीन सचिव गजानन नवघरे हे विरोधकांना बाजार समिती संबंधित महत्त्वाचे दस्तऐवज पुरवीत होते. त्यांच्या हस्ताक्षरातील काही दस्तऐवज जप्त करण्यात आले. त्यांनी स्कॅन करून काही दस्तऐवज विरोधकांना व्हॉटसॲप केले. त्यामुळे मोबाईल रीतसर प्रक्रियेद्वारे जप्त करण्यात आला, असे सभापती जयंत साबळे यांनी सांगितले.