Arun Jagtap Passes Away : माजी आमदार अरुणकाका जगताप यांचे निधन

Pune News : अहिल्यानगरचे माजी नगराध्यक्ष व विधानपरिषदेचे माजी आमदार अरुणकाका बलभीम जगताप यांचे आज (ता.२) अल्पशा आजाराने निधन झाले. पुणे येथे एका खासगी रुग्णालयात त्यांच्यावर उपसाचर सुरु होते. उपचार सुरू असताना त्यांची प्राणज्योत मालवली. ते ६७ वर्षांचे होते.

अरुण जगताप हे अहिल्यानगरच्या राजकारण आणि समाजकारणात काका नावाने परिचित होते. अरुण जगताप यांची राजकीय कारकीर्द काँग्रेसमधून सुरू झाली. युवक काँग्रेसचे अध्यक्षपद त्यांनी भूषविले होते.

अहिल्यानगर पालिकेचे नगराध्यक्षपदही त्यांनी भूषविले आहे. जिल्हा क्रिकेट संघटनेचे ते अध्यक्ष होते. तसेच गुणे आयुर्वेद शैक्षणिक संस्थेचे ते अध्यक्ष होते. अरुण जगताप हे राष्ट्रवादी काँग्रेसकडून सलग दोनवेळा स्थानिक स्वराज्य संस्थेतून विधानपरिषदेवर निवडून गेले होते.

अरुणकाका जगताप यांची प्रकृती खालावल्याने त्यांना पुण्यात खाजगी रुग्णालयात दाखल केले होते. अरूणकाका यांना रुग्णालयात दाखल केल्याचे समजताच हॉस्पिटलमध्ये मोठ्या प्रमाणात नागरिकांची गर्दी झाली होती. अरुणकाकांवर अतिदक्षता विभागात उपचार चालू असल्याने त्यांना कोणालाही भेटता येत नव्हते.

नागरिकांनी नगरहून पुण्यात येऊ नये, असे आवाहन राष्ट्रवादी काँग्रेसचे शहर जिल्हाध्यक्ष संपत बारस्कर यांनी केले होते. मागील काही दिवसांपासून पुणे येथे खाजगी रुग्णालयात अतिदक्षता विभागात त्यांच्यावर उपचार चालू होते. तज्ज्ञ डॉक्टर त्यांच्यावर उपचार करत होते. मात्र आज (ता.२) त्यांची प्राणज्योत मालवली.

अरुणकाका जगताप यांचे पार्थिव दुपारी २ वाजता सारसनगर येथे त्यांच्या राहत्या घरी अंतिम दर्शनासाठी ठेवण्यात येणार आहे. त्यानंतर त्यांच्या पार्थिवावर ४ वाजता अहिल्यानगर येथील स्मशानभूमीत अंत्यसंस्कार करण्यात येतील, अशी माहिती निकटवर्तीयांनी दिली.

त्यांच्या पश्चात पत्नी पार्वती, मुले राष्ट्रवादी काँग्रेसचे आमदार संग्राम जगताप, माजी जिल्हा परिषद सदस्य सचिन, सुना, नातवंडे असा परिवार आहे. भाजपचे राहुरीचे आमदार शिवाजीराव कर्डिले यांचे ते व्याही होते.