Land Acquisition Issue: सुरत-चेन्नई मार्गासाठी जबरदस्तीने भूसंपादन

Solapur News: सुरत-चेन्नई या महामार्गाचे जिल्ह्यातील पहिल्या टप्प्यातील काम सुरू झाले असून, महामार्गासाठी जबरदस्तीने भूसंपादन सुरू आहे. यासाठी मैंदर्गी (ता. अक्कलकोट) येथील चार शेतकऱ्यांच्या सुमारे तीन एकर गव्हाच्या पिकामधून जेसीबी घालत रस्त्याचे काम सुरू करण्यात आले आहे. यामुळे बाधित शेतकऱ्यांतून तीव्र संताप व्यक्त होत आहे.

सुरत-चेन्नई महामार्गाचे चेन्नई ते अक्कलकोट दरम्यानचे काम जोरात सुरू आहे. या कामासाठी हायवा जाण्यासाठी दहा फुटाच्या रस्त्याची तातडीने आवश्यकता असल्याने शेतकऱ्याच्या उभ्या पिकाचा विचार न करता, राष्ट्रीय महामार्ग विकास प्राधिकरणाने गहू पीक जमीनदोस्त करून कामाला सुरुवात केली आहे. गव्हाचे हिरवेगार पीक जमीनदोस्त करताना शेतकऱ्यांचा कन्नड भाषेत सुरू असलेला आक्रोश पाहून राज्यभरात इतर बाधित शेतकऱ्यांमध्ये संताप निर्माण झाला आहे.

या घटनेचा परिणाम प्रस्तावित शक्तिपीठ बाधित शेतकऱ्यांवर देखील झाला आहे. बाधित शेतकऱ्यांना तीन आठवडे ते एक महिना मुदत दिली असती, तरीदेखील पीक पदरात पडले असते. या महामार्गाचा मोबदला उचलला नसतानाही पोलिस बंदोबस्तासह बळाचा वापर पिकांचे नुकसान करण्यात आले आहे.

...या शेतकऱ्यांचे नुकसान

सुरत-चेन्नई ग्रीनफिल्ड एक्स्प्रेस-वेसाठी अक्कलकोट तालुक्यातील मैंदर्गी येथील शरणबसप्पा मल्लिनाथ भुती (गट नंबर ४९१) यांची ५० गुंठे, सूर्यकांत दरेप्पा हिरतोट (गट नंबर ४९७) यांची १९ गुंठे, शिवचलप्पा श्रीमंत हिरतोट (गट नंबर ४९८) यांची १९ गुंठे, तर सुरेश बसवण्णा हिरतोट (गट नंबर ४९९) यांची १७ गुंठे या चार शेतकऱ्यांच्या मालकीच्या व कब्जेवहिवाटीच्या एकूण १०५ गुंठे जमिनीवरील पिकांचे नुकसान करण्यात आले आहे. या शेतकऱ्यांची जमीन बागायत असतानाही कोरडवाहू गृहीत धरण्यात आली आहे. यामुळे हे प्रकरण न्यायप्रविष्ट आहे, असे बाधित शेतकऱ्यांच्या वकिलांचे म्हणणे आहे.