Land Acquisition : तळेरे-करूळ महामार्ग भूसंपादनावरून जमीनमालक आक्रमक

Sindhudurg News : तळेरे-करूळपर्यत सुरू असलेल्या महामार्गाच्या भुसंपादनावरून पाच गावांतील जमीनमालक काल (ता. ७) आक्रमक झाले.जोपर्यंत ठोस निर्णय होत नाही तोपर्यंत संपादित न झालेल्या जमिनीत काम करू नये अशी भूमिका जमीनमालकांनी घेतली.

दरम्यान एक महिन्यात कागदपत्रांची पडताळणी करून पुढील निर्णय घेऊ असे प्रांताधिकाऱ्यांनी स्पष्ट केले. तळेरे-करूळ या महामार्गावरील नाधवडे, कोकिसरे, वैभववाडी, एडगाव आणि करूळ या गावांतील जमिनीचे भूसंपादन न करताच महामार्गाचे काम सुरू आहे.

या संदर्भात आज (ता. ७) येथील तहसिल कार्यालयात महसुल, राष्ट्रीय महामार्ग, आणि जमीनमालकांची सयुंक्त बैठकीचे आयोजन करण्यात आले होते. या बैठकीला प्रांताधिकारी जगदीश कातकर, तहसीलदार सूर्यकांत पाटील, राष्ट्रीय महामार्ग प्रधिकरणचे उपअभियंता अतुल शिवनिवार, प्रमोद रावराणे, सुधीर नकाशे आदी उपस्थित होते.

तळेरे-कोल्हापुर महामार्गाच्या कॉक्रीटीकरणाचे काम सध्या युद्धपातळीवर सुरू आहे. या महामार्गाचे भूसंपादन झालेले नसताना या महामार्गाचे काम सुरू आहे. त्यामुळे ज्या जमिनीचे भूसंपादन झालेले आहे.त्याच जमिनीत रस्त्याचे काम करावे.

ज्या जमिनीचे भूसंपादन झालेले नाही त्या जमिनीत काम करू नये अशी आक्रमक भूमिका जमीनमालकांनी मांडली. महामार्ग प्रधिकरणकडुन मनमानी सुरू आहे.भूसंपादन झालेली कोणतीही कागदपत्रे नाहीत त्यामुळे काम थांबवा अशी मागणी देखील करण्यात आली.

यावेळी प्रांताधिकारी श्री.कातकर यांनी तळेरे-करूळ पर्यतचे भूसंपादन झालेले आहे. नव्याने ६.३६ हेक्टर भूसंपादनाचा प्रस्ताव आला असल्याचे स्पष्ट केले. मात्र, जमीनमालकांनी भूसंपादन केलेल्या कागदपत्रांची मागणी केली.

यावेळी प्रांताधिकाऱ्यांनी या रस्त्यांच्या भुसंपादनाविषयीची कागदपत्रे रत्नागिरी आणि गगनबावडा येथे आहेत का याची पडताळणी करण्यात येईल.त्याकरिता महिनाभराचा वेळ द्या असे आवाहन केले. त्यानंतर पुन्हा बैठक घेवुन पुढील निर्णय घेतला जाईल असे स्पष्ट केले.