Kolhapur Agriculture : शेतकऱ्यांनी फार्मर आयडी काढून घ्यावे; कृषी विभागाकडून आवाहन

Farmers ID : कृषी विभागामार्फत राबविण्यात येणाऱ्या विविध योजनांच्या लाभासाठी तसेच १५ जुलै २०२५ पासून मदत व पुनर्वसन विभागांतर्गत नैसर्गिक आपत्तीमुळे होणाऱ्या शेतीपिके, शेतजमिनीच्या नुकसानीच्या मदतीसाठी कृषी विभागाच्या ॲग्रीस्टॅक योजनेअंतर्गत मिळालेला शेतकरी ओळखपत्र क्रमांक (फार्मर आयडी) बंधनकारक करण्यात आला आहे. ॲग्रीस्टॅक ओळख क्रमांक देण्यासाठी गावनिहाय सूक्ष्म नियोजन करुन जिल्ह्यातील प्रत्येक शेतकऱ्यांची नोंदणी १५ मे २०२५ पर्यंत करून घ्या, अशा सूचना महसूल उपजिल्हाधिकारी डॉ. संपत खिलारी यांनी केल्या.

ॲग्रीस्टॅक योजनेअंतर्गत शेतकरी ओळखपत्र क्रमांक काढून घेण्याबाबत जिल्हाधिकारी कार्यालयातील शाहू सभागृहात दूरदृश्यप्रणालीद्वारे बैठक घेण्यात आली. या वेळी जिल्हा अधीक्षक कृषी अधिकारी जालिंदर पांगरे, तसेच तालुकास्तरावर सर्व तहसीलदार, गट विकास अधिकारी, तालुका कृषी अधिकारी उपस्थित होते.

कोल्हापूर जिल्ह्यात पंतप्रधान किसान योजनेतील ६ लाख ३ हजार शेतकऱ्यांपैकी ३ लाख ४५ हजार ३०५ शेतकऱ्यांनी ॲग्रीस्टॅक क्रमांक घेतला आहे. त्यामुळे याचे ५७.२६ टक्के काम पूर्ण झाले आहे. पंतप्रधान किसान योजनेतील जे अक्रियाशील (इनॲक्टिव्ह) शेतकरी आहेत, त्या पात्र शेतकऱ्यांना शासनाच्या विविध कृषी योजनांचा लाभ घेण्यासाठी ॲग्रीस्टॅक क्रमांक महत्त्वाचा आहे.

मृत शेतकरी आढळल्यास त्यांच्या वारसांची नोंदणी करा. पंतप्रधान किसान योजनेतील उर्वरित २ लाख ५७ हजार ७२३ शेतकऱ्यांची नोंदणी दहा दिवसांत पूर्ण करा. तसेच कृषी गणनेनुसार जिल्ह्यातील ७ लाख ४१ हजार ५५० शेतकऱ्यांपैकी ४ लाख ११ हजार ४६४ शेतकऱ्यांची नोंदणी झाली आहे. येत्या १५ दिवसांत ९० टक्क्यांहून अधिक काम पूर्ण करण्याचे उद्दिष्ट ठेवण्याच्या सूचना डॉ. खिलारी यांनी केल्या. सर्व तालुक्यांतील शेतकऱ्यांचा फार्मर आयडी काढून घेण्यासाठी केलेल्या व करण्यात येणाऱ्या कामाबाबत तहसीलदार व तालुका कृषी अधिकारी यांनी माहिती दिली.