Parbhani News: मिरची तसेच इतर शेतीमालाच्या निर्यातीसाठी शेतकऱ्यांनी शेतकरी उत्पादक कंपनीच्या माध्यमातून एकत्र यावे लागेल. वेळापत्रकानुसार काटेकोर व्यवस्थापन केल्यास निर्यातक्षम मिरची तसेच भाजीपाला, फळांचे उत्पादन घेणे शक्य आहे. उत्पादन खर्च कमी करण्यासाठी प्रयत्न करावे लागतील, असा सूर निर्यातक्षम मिरची लागवड तंत्रज्ञान शेतकरी कार्यशाळेत उमटला.
परभणी येथील कृषी विज्ञान केंद्र आणि सानुप्रिया शेतकरी उत्पादक कंपनीतर्फे रविवारी (ता.२३) निर्यातक्षम मिरची लागवड तंत्रज्ञान शेतकरी कार्यशाळा व सन्मान सोहळा आयोजित करण्यात आला होता. यावेळी अध्यक्षस्थानी कृषी तंत्रज्ञान व्यवस्थापन यंत्रणाचे (आत्मा) प्रकल्प उपसंचालक अभिषेक घोडके,
तालुका कृषी अधिकारी (पाथरी) गोविंद कोल्हे, वसंतराव नाईक मराठवाडा कृषी विद्यापीठातील अन्नतंत्र महाविद्यालयाचे निवृत्त सहयोगी अधिष्ठाता पांडुरंग सत्वधर, कृषी विज्ञान केंद्राचे उद्यानविद्या विशेषज्ञ अमित तुपे, डॉ.मधुकर चांगाडे, सानुप्रिया शेतकरी उत्पादक कंपनीच्या अध्यक्षा सुप्रिया अभिषेक चांगाडे, सवाईसिंह निठारवाल, सुनील मानोलीकर, ज्ञानेश्वर पवार, तुकाराम थोरवट आदी उपस्थित होते.
कोल्हे म्हणाले, की कृषी विभागाकडून फायटोसॅनिटरी प्रमाणपत्र घेऊन शेतकरी उत्पादक कंपनीच्या माध्यमातून एकत्रित येऊन निर्यातक्षम मिरची तसेच इतर भाजीपाल्याचे उत्पादन घ्यावे.घोडके म्हणाले, की निर्यातक्षम मिरची उत्पादनांवर होणारा खर्च कमी झाला तर अधिक नफा मिळेल.
तुपे म्हणाले, की निर्यातीसाठी योग्य व्यवस्थापनातून उच्च दर्जाचा तसचे किटकनाशकांचे अंशमुक्त (रेसीड्यू फ्रि) भाजीपाल्याचे उत्पादन घेणे गरजेचे आहे. अभिषेक चांगाडे म्हणाले, की शेतकरी एकत्र आल्यामुळे परभणी जिल्ह्यातून हिरव्या मिरचीची निर्यात करणे शक्य झाले. निर्यात वृद्धीसाठी येत्या काळात परभणी जिल्ह्यात पॅक हाऊस, कोल्ड स्टोरेज सुविधा उभारल्या जातील. मिरची उत्पादक शेतकरी विठोबा गयाळ म्हणाले, मजुरीसह मशागतीचे दर वाढले आहेत. शेतकरी विपरित परिस्थितीत निर्यातक्षम मिरचीचे उत्पादन घेत आहेत.
निर्यातक्षम मिरची उत्पादन घेणाऱ्या शेतकऱ्यांना सन्मान
खरीप हंगाम २०२४ मध्ये निर्यातक्षम मिरचीचे सरस उत्पादन घेतलेल्या रोहिदास लिंगायत, सोपान पवार, विठोबा गायाळ, आत्माराम पवार, शेख राजासाब (सर्व रा.नाव्हा.ता.पालम), अंगद उक्कलकर, भरत मसलकर, सुखदेव पिंपळे, रामप्रसाद उक्कलकर, धुराजी उक्कलकर (सर्व रा.उक्कलगाव,ता.मानवत) या शेतकऱ्यांचा सन्मान मान्यवरांच्या हस्ते करण्यात आला.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.