Wheat Farming: दौंडमध्ये गव्हाचे पीक जोमात

Pune News: चालुवर्षी थंडीचे हवामान पोषक तयार झाल्याने दौंड तालुक्यात गहू पिकाची चांगली वाढ झालेली आहे. यामुळे उत्पादनात निश्चितपणे वाढ होण्याची शक्यता आहे. तालुक्यात साधारणतः दिवाळीनंतर गहू पिकाची पेरणी सुरू होते. शेतकऱ्यांनी विविध वाणाच्या बियाण्यांची पेरणी केली आहे.

यावर्षी डिसेंबर, जानेवारी महिन्यांमध्ये पिकासाठी उपयुक्त थंडी पडल्यामुळे गव्हाची ओंबी देखील मोठी पडली आहे. यामुळे चांगला उतार येण्याची शक्यता आहे.

सध्या गव्हाला अडीच ते साडेतीन हजार रुपयांपर्यंत क्विंटलला भाव बाजार समितीमध्ये तर पस्तीस ते चाळीस प्रतिकिलोस भाव किरकोळ बाजारात मिळत आहे. लवकरच गव्हाच्या पिकाच्या काढणीला सुरुवात होणार आहे.

या बाबत देऊळगाव राजे येथील गहू उत्पादक शेतकरी रवींद्र गिरमकर म्हणाले की, चालूवर्षी अडीच ते तीन महिने थंडीचे वातावरण मिळाले. यामुळे चांगली वाढ झाली आहे.ओंबी ही मोठी पडल्याने गव्हाचा उतारा निश्चितपणे वाढणार आहे.