Farmer Loan : कर्जमाफीसाठी सहकारमंत्री वळसे-पाटील यांच्या घरासमोर शेतकऱ्यांचं आंदोलन

राज्याचे सहकारमंत्री दिलीप वळसे पाटील यांच्या मंचर येथील घरासमोर शुक्रवारी (ता.१६) कर्जमाफीसाठी शेतकऱ्यांनी आंदोलन सुरू केलं आहे. पात्र शेतकऱ्यांना कर्जमाफी मिळावी, या मागणीसाठी नेवासा तालुक्यातील करजगाव येथील शेतकऱ्यांनी आंदोलन पुकारलं आहे. २०१७ साली राज्य सरकारने छत्रपती शिवाजी महाराज शेतकरी सन्मान कर्जमाफी योजना तत्कालीन मुख्यमंत्री देवेंद्र फडणवीस यांनी जाहीर केली. परंतु या योजनेतून ७० टक्के शेतकऱ्यांना लाभ मिळाला. उर्वरित ३० टक्के शेतकरी पात्र असूनही कर्जमाफीपासून वंचित राहिले. या पात्र शेतकऱ्यांना कर्जमाफी मिळावी, यासाठी शेतकऱ्यांनी आक्रमक भूमिका घेत आंदोलन सुरू केलं आहे.

२०१७ च्या कर्जमाफी योजनेत करजगाव येथील २१२ शेतकरी पात्र असूनही वंचित राहिले. कारण २०१९ मध्ये सत्तांतर झालं. महाविकास आघाडी सरकार सत्तेत आलं. महाविकास आघाडी सरकारने महात्मा जोतिराव फुले शेतकरी कर्जमुक्ती योजना राबवली. त्यामुळे २०१७ ची योजना मागे पडली. परंतु २०२२ मध्ये पुन्हा भाजप आणि शिंदे शिवसेना यांनी एकत्र सरकार स्थापन केलं. त्यावेळी २०१७ च्या योजनेतील पात्र शेतकऱ्यांची कर्जमाफी करण्याची घोषणा केली. त्यामुळे शेतकऱ्यांना कर्जमाफी होईल असं वाटत होतं. परंतु अद्यापही शेतकऱ्यांना कर्जमाफी मिळाली नाही.

आंदोलक शेतकऱ्यांनी मागील चार दिवस करजगाव येथे आंदोलन केलं परंतु या आंदोलनाची दखल न घेतल्यामुळे गुरुवारी (ता.१५) सायंकाळी आंदोलक शेतकऱ्यांनी मंचरमध्ये सहकार मंत्री दिलीप वळसे पाटील यांच्या घरासमोर आंदोलन सुरू केलं. यावेळी शेतकरी घोषणा देत आहेत. तसेच कर्जमाफी केली तरच आम्ही माघार घेऊ अन्यथा इथेच विष प्राशन करून आत्महत्या करू, असा इशाराही आंदोलक शेतकऱ्यांनी दिला आहे. त्यामुळे आंदोलन अधिक आक्रमक होण्याची चिन्हं दिसू लागली आहेत.

दरम्यान, आंदोलक शेतकरी कर्जमाफीच्या मागणीवर ठाम आहेत. शुक्रवारी (ता.१६) दुपारी सहकार मंत्री दिलीप वळसे पाटील आंदोलक शेतकऱ्यांची भेट घेणार असल्याची माहिती समोर आली.