Maize Seed Price Hike: दरवाढीनंतर मका बियाणे विक्रीत शेतकऱ्यांची लूट

Nashik News : खरीप हंगामात शेतकऱ्यांकडून मका लागवडीची लगबग सुरू असतानाच मका बियाणे उत्पादक कंपन्यांनी चार किलोच्या बॅगमागे ३५० ते ४०० रुपयांनी दरवाढ केली आहे. त्यातच आता काही विशिष्ट वाणांच्या बियाण्यांच्या विक्रीत निविष्ठा विक्रेते चढ्यादराने विक्री करत असल्याच्या तक्रारी समोर आल्या आहेत. या दरवाढीचा शेतकऱ्यांना फटका बसला असून बियाण्याच्या कृत्रिम टंचाई निर्माण केली जात असल्याचा अनुभव शेतकऱ्यांना येत आहे.

अगोदरच दरवाढीमुळे नाशिक विभागातील शेतकऱ्यांच्या खिशाला ७५ कोटींहून अधिक भुर्दंड बसला आहे. त्यातच आता काही विक्रेते २०० ते २५० रुपये अधिक दर घेऊन काही मागणी असणाऱ्या बियाण्यांची उपलब्ध करून देत असल्याचेही शेतकरी सांगत आहेत. यामध्ये बॅगवर मुद्रित किंमत व विक्री किंमत या तफावत असल्याने मोठा गोंधळ निर्माण झाला आहे. मागणीमुळे दरही चांगले असल्याने शेतकरी लागवडी करत आहे. मात्र शेतकऱ्यांच्या या मानसिकतेचा काही कंपन्या फायदा घेऊन दरवाढ करत आहे का? असा सवाल उपस्थित होत आहे.

अधिक उत्पादन क्षमता, तुलनेत नफा व इतर पिकांच्या तुलनेत जनावरांसाठी मिळणारा अधिक चारा यामुळे मका लागवडीच्या क्षेत्रात वाढ होत आहे. नाशिक विभागात जवळपास ४.२१ लाख हेक्टर क्षेत्रावर मका लागवड होते. नाशिक विभागात नाशिक, धुळे, नंदुरबार व धुळे अशा चारही जिल्ह्यांत मका लागवड होते. नाशिकमध्ये सर्वाधिक २ लाख ३६ हजार हेक्टर क्षेत्र आहे. अन्नप्रक्रिया, स्टार्च उद्योग, कुकुटखाद्य यासह चाऱ्याची उपलब्धता होत असल्याने गेल्या पाच वर्षांत मका लागवड क्षेत्र सातत्याने वाढते आहे.

या आहेत शेतकऱ्यांच्या तक्रारी

- मका बियाण्याच्या किमतीत २० ते २५ टक्के वाढ.

- विक्रेत्यांकडून दर आठवड्यात बियाण्याचे दर बदलते.

- शेतकऱ्यांची लूट होत असताना यावर कोणाचे नियंत्रण नाही.

- कंपन्या आणि विक्रेत्यांची मनमानी सुरू, प्रशासकीय यंत्रणेने घेतले झोपेचे सोंग.

- बहुतेक कंपन्यांकडून दरवाढ, त्यात विक्रेत्यांकडून चढ्या दराने विक्रीतून पुन्हा लूट.