Chia Seeds : चिया सीड पिकाकडे शेतकऱ्यांचा कल

Akola News : रब्बी हंगामात गहू, हरभरा या पारंपरिक पिकांसोबतच शेतकरी काही ठिकाणी चिया सीडची लागवड करीत आहेत. प्रामुख्याने बाळापूर, पातूर तालुक्यात नावीन्य पूर्ण प्रयोग म्हणून ही लागवड यंदा वाढल्याचे दिसून येत आहे. पिकाची लागवड सुरू झालेली असून काही ठिकाणी उगवणसुद्धा होत आहे.

कमी खर्चात हे पीक शाश्‍वत उत्पादन देते अशी ओळख मागील दोन-तीन हंगामांत तयार झाली आहे. मागील वर्षात जिल्ह्यात काही क्षेत्रावर पेरणी झाली होती. अनुभव चांगला आल्याने या हंगामात बाळापूर तालुक्यात चिया सीडची लागवड वाढली आहे.

यंदा दीडशे ते दोनशे एकरांपर्यंत या पिकाची लागवड होण्याची शक्‍यता वर्तवली जात आहे. बाळापूर तालुक्यात नकाशी, भरतपूर, वाडेगाव, देगाव, मानकी, कान्हेरी, टाकळी, खिरपुरी, बटवाडी आदी गाव शिवारात लागवड झालेली आहे.

गेल्या हंगामात एकरी साडेपाच ते सहा क्विंटलपर्यंत उत्पादन झालेले आहे. ११० दिवसांत हे पीक तयार होते. मागील हंगामात शेतकऱ्यांना १० हजारांवर चियासीडला दर मिळाले होते. गेल्या हंगामातील हा अनुभव पाहता शेतकरी या हंगामात पुन्हा चिया सीडच्या लागवडीसाठी पुढे आल्याचे दिसून येत आहे.

चिया सीड हे एक अतिशय लहान बियाणे आहे. चिया हे पोषणमूल्ये असलेले बियाणे आहे. ग्लुटेनमुक्त संपूर्ण धान्य म्हणूनही ओळखले जाते. चिया सीड हे सहज व पचण्याजोगे असते. यात ॲटिऑक्सिडंटस भरपूर प्रमाणात आहेत. फायबर व ओमेगा ३ फॅटी ॲसिडने समृद्ध म्हणून ओळखले जाते.