Ratnagiri Rabbi Season : रत्नागिरी जिल्ह्यात खरीपाच्या हंगामातील भातशेती अंतिम टप्प्यात असताना सध्या रब्बी हंगामाच्या शेतीची लगबग वाढली आहे. खरिपाच्या शेतीला परतीच्या पावसाचा तडाखा बसून झालेल्या नुकसानीचे ओझे पाठीवर घेऊन शेतकरी राजा रब्बी हंगामातील शेतीच्या मशागतीमध्ये गुंतला आहे. कोकणातील तालुक्यातील ठिकठिकाणी विविध फळभाज्यांसह कुळीथ, आदींसाठी जमिनीची नांगरणी सुरू झाली आहे. काही ठिकाणी पेरण्या झाल्याचे चित्र पहायला मिळत आहे.
यावर्षीच्या खरिपाच्या भातशेतीला पावसाचा वारंवार फटका बसला. अशा स्थितीतही भातशेतीचे पीक चांगल्या प्रकारे आले होते. मात्र, एकदा परतीच्या पावसाने घातलेल्या धुमाकुळामुळे हातातोंडाशी आलेल्या भात पिकाचे मोठ्या प्रमाणात नुकसान झाले. त्यामुळे शेतकरी बेजार झाला होता. दरम्यान खरिपानंतर लगेच रब्बी पिकाच्या पेरणीसाठी शेतकऱ्यांनी कंबर कसल्याचे रत्नागिरी जिल्ह्यात पहायला मिळत आहे.
रब्बीच्या हंगामामध्ये शेतकरी कुळीथ, संकरित मका, कडधान्य, पावटा, मूग यांसारख्या विविध प्रकारच्या भाज्यांच्या बियाण्यांची पेरणी करत आहेत. खरिपामध्ये लागवड केलेली भातकापणी झाली असून, आता रब्बी हंगामाला सुरुवात झाली आहे.
रब्बी हंगामामध्ये कडधान्यासह भाजीपाल्याची दरवर्षी लागवड करतो. त्याप्रमाणे यावर्षी लागवड सुरू आहे. गेल्या काही दिवसांमध्ये सातत्याने पडणाऱ्या पावसामुळे जमिनीमध्ये ओलावा आहे. त्याचा फायदा घेत नांगरणी आणि त्यानंतर बियाणी पेरणी सुरू असल्याचे मत रत्नागिरी जिल्ह्यातील शेतकऱ्यांनी व्यक्त केले.
रत्नागिरी जिल्ह्यातील राजापूर तालुक्यात एकूण १ लाख १९ हजार ९१७ हेक्टर भौगोलिक क्षेत्र आहे. यापैकी ११८१४ हेक्टर खरीप आणि रब्बी ११७६४ हेक्टर पिकांची पेरणी होते. पावटा, उडीद, भाजीपाला, भूईमूग, हरभरा, मूग, कुळीथ यासारखी रब्बी हंगामातील पिके घेतली जातात.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.