Strawberry Farming : पालघरमध्येही बहरणार स्ट्रॉबेरीचे मळे

Palghar News : ग्रामीण भागासह आदिवासी समाजातील शेतकरी वर्गाचे रोजगारासाठी मोठ्या प्रमाणात स्थलांतर होते. मात्र अनेक समस्यांवर मात करून जिल्ह्यातील शेतकरी विविध नावीन्यपूर्ण प्रयोग यशस्वी करीत आहेत.

पाचगणी, महाबळेश्वरसारख्या थंड हवेच्या ठिकाणी उत्पादित होणाऱ्या स्ट्रॉबेरी लागवडीकडे जव्हार, मोखाडा तालुक्यासह डहाणू भागातील शेतकरी प्रायोगिक दृष्टिकोनातून वळला आहे. त्यामुळे जिल्ह्यातील शेतकऱ्यांची आर्थिक घडी मजबूत होण्यास मदत होत आहे.

आदिवासी समाजातील बहुतेक नागरिक हे पावसाळ्यानंतर रोजगारासाठी स्थलांतर करतात. हाताला काम नसल्याने शेतकरी वर्ग रोजगारासाठी शहरांकडे जातो. आसनगाव येथील कृषी तंत्र विद्यालयामध्ये यंदा प्रायोगिक तत्त्वावर स्ट्रॉबेरीची लागवड करण्यात आली आहे. जिल्ह्यातील शेतकऱ्यांनी स्ट्रॉबेरीची लागवड केल्यामुळे येथील रोजगार वाढून स्थलांतर संपुष्टात येण्यास मदत होईल.

आता पालघरवासीयांना जिल्ह्यातच स्ट्रॉबेरीची लागवड करून घरच्या घरी खाण्यासाठी तसेच विक्रीसाठी उपलब्ध होऊ शकते. या स्ट्रॉबेरीला वानगाव, डहाणू, बोईसर भागात मोठी मागणी असल्याने विक्री होत आहे. स्थानिक बाजारपेठेत प्रतिकिलो ३०० रुपयांचा भाव मिळत आहे. यामुळे शेतकऱ्यांना स्थानिक ठिकाणीच रोजगार आणि उत्पन्न मिळू लागल्याने काही अंशी स्थलांतराला आळा बसला आहे.

उत्पादनाचा अंदाज

अधिक उत्पादनासाठी ऑक्टोबरच्या पहिल्या आठवड्यात स्ट्रॉबेरीची लागवड करावी. त्यामुळे डिसेंबरमध्ये स्ट्रॉबेरीला साधारणपणे ५०० ते ६०० रुपये प्रति किलोला भाव मिळतो. लागवड उशिरा झाल्यास फळ धारणेलाही उशीर होतो. त्या काळात ३०० रुपये प्रतिकिलो भाव मिळतो.

एका झाडाला साधारणपणे ७०० ते ८०० ग्रॅम फळे लागतात. एक फूट बाय एक फूट अंतरावर लागवड केली. सिंचनासाठी ठिबक पद्धतीचा अवलंब करण्यात आला. तण नियंत्रण आणि जमिनीत ओलावा टिकून राहावा, यासाठी मल्चिंग पेपरवर लागवड करण्यात आली.