Milk Powder Import : दूध भुकटी आयातीवरून शेतकऱ्यांत संताप

Solapur News : जिल्ह्यातील दूध उत्पादकांना या आधीच गाईच्या दुधाला प्रतिलिटर २५ ते २६ रुपये इतका कमी दर मिळत असताना, आता केंद्र शासनाने १० हजार टन दूध भुकटी आयात करण्याचा निर्णय घेतल्याने त्याचा थेट परिणाम सोलापूर जिल्ह्यातील दूध उत्पादकांना बसणार आहे. सरकारच्या या धोरणावर दूध उत्पादकांनी तीव्र शब्दांत संताप व्यक्त केला.

सोलापूर जिल्हा दूध उत्पादनातील आघाडीवरचा जिल्हा आहे. जिल्ह्यात जिल्हा दूध संघ, शिवामृत दूध संघ या दोन सहकारी दूध संघाशिवाय सहा ते आठ खासगी दूध संघांमार्फत दूध संकलन होते. रोज साधारण दीड लाख लिटरपर्यंतचे संकलन जिल्ह्यात होते. त्यात सर्वाधिक गाईच्या दुधाचा समावेश आहे.

जिल्ह्यात जवळपास १२ लाख ४१ हजार ८५८ लहान-मोठी जनावरे आहेत. त्यात दुभत्या जनावरांची संख्या सर्वाधिक आहे. या जनावरांचा विचार करता दिवसाला २० हजार टन चारा लागतो आहे. एकीकडे कमी पावसामुळे चाऱ्याची वाणवा आहे. तर दुसरीकडे पशुखाद्याच्या वाढत्या दराने शेतकऱ्यांची अडचण झाली आहे.

विशेषतः दुभत्या जनावरांच्या दुधावर त्याचा परिणाम झाला आहे. पशुखाद्य, चारा यावरील वाढता खर्च आणि मिळणारा २५-२६ रुपयांचा दर याचा मेळ बसत नसल्याने शेतकरी आर्थिकदृष्ट्या अडचणीत आहे. त्यातूनही कसाबसा व्यवसाय टिकवून ठेवला असताना, आता सरकारने दूध भुकटी आयात करण्याचा निर्णय घेऊन दूध उत्पादकांच्या जखमेवर मीठ चोळण्याचा प्रकार केला आहे, अशा प्रतिक्रिया शेतकऱ्यांनी व्यक्त केल्या आहेत.