Milk Powder Import : दूध संघाबरोबर उत्पादकांचेही अर्थकारण बिघडणार

Kolhapur News : दूध पावडर आयातीच्या निर्णयाची अंमलबजावणी झाल्यास याचा विपरित परिणाम दूध संघांच्या अर्थकारणाबरोबरच शेतकऱ्यांच्या दरावरही होण्‍याची भीती निर्माण झाली आहे.

जिल्ह्यातील विविध दूध संघांमार्फत दररोज सुमारे पन्नास टन दुधाची पावडर तयार केली जाते. अनेक ठिकाणी खासगी पावडर प्लॅंटधारकांकडूनही दूध पावडरची निर्मिती केली जाते. जिल्ह्यातील विविध संघांमध्ये सुमारे सात हजार टन दूध पावडर शिल्लक आहे. त्याची मागणीनुसार विक्री होते.

दर नसल्यामुळे संघाने पावडर गोदामांमध्येच ठेवणे पसंत केले आहे. आता केंद्राच्या नव्या निर्णयाने दूध संघांपुढे विक्रीचा पेच निर्माण झाला आहे. पावडर शिल्लक राहू लागली तर अनेक दूध संघ गाईच्या दुधाची खरेदी किंमत कमी करण्याच्या तयारीत आहेत. सहकारी संघांपेक्षा खासगी दूध संघांकडून दर कपातीचा धोका असल्‍याने याचा फटका जिल्ह्यातील लाखो दूध उत्पादकांना बसणार आहे.

सध्या गाईच्या दुधाचा पुरवठा अपेक्षित नसला तरी दुधाचे संकलन वाढले आहे. यामुळे शिल्लक दुधाची पावडर तयार करावी लागत आहे. सध्या दुधाचा चांगला पुरवठा असल्याने पावडरीलाच मागणी नाही. पावडर शिल्लक राहात आहे. यातच आयातीचा निर्णय झाला तर ही दूध उद्योगासाठी धोक्याची घंटा असल्याचे मत दूध उद्योगातून व्‍यक्त होत आहे. जिल्ह्यात एकूण जनावरांची संख्या ८ लाख ३१ हजार ४७६ आहे.

यामध्ये गाई २ लाख ७७ हजार ८२३ तर म्हशी ५ लाख ५३ हजार ६५३ आहेत. पाच सहकारी व पंधरा खासगी दूध संघांच्या साडेचार ते पाच हजार दुग्ध संस्थांमधून सुमारे २५ लाख लिटर दुधाचे संकलन होते. यामध्ये पंधरा लाख लिटरपर्यंत म्हशीचे तर दहा लाख लिटर गाईच्या दुधाचे संकलन होते. मोठ्या नामवंत दूध संस्था पावडर निर्मिती करतात. गायीच्या दुधाची मागणी पाहून दुधाच्या पावडरीचा निर्णय घेतला जातो.

उन्हाळ्यात दुधाचा पुरवठा कमी असल्याने पावडरीला मागणी वाढते. पण जिल्ह्यात यंदा दुधाच्‍या संकलनात घट झाली नाही. गोकुळ सारख्या मोठ्या संघाकडे गायीच्या दुधाचा ओघ कायम राहिला यामुळे अशा संघांना पावडर करण्याशिवाय पर्याय राहिला नाही. जिल्ह्यात म्हशीच्या दुधाला दहा फॅटला ६५ रुपये आणि गायीला पाच फॅट व नऊ एसएनएफला ३७ रुपये इतका दर आहे. अनेक दूध संघांचे दर थोड्या फार प्रमाणात कमी अधिक प्रमाणात आहेत.