Farmer Scientist Meet: शेतकरी-शास्त्रज्ञ संवाद मंच ठेरतेय प्रभावी उपक्रम

Akola News: डॉ. पंजाबराव देशमुख कृषी विद्यापीठाचे कुलगुरू डॉ. शरद गडाख यांच्या संकल्पनेतून सुरू करण्यात आलेला शेतकरी - शास्त्रज्ञ संवाद मंच हा उपक्रम विदर्भातील शेतकऱ्यांसाठी प्रभावी ठरत आहे. जिल्हानिहाय व पीकनिहाय शेतकरी-शास्त्रज्ञ मंच स्थापन करण्यात आले असून, सर्व बाबींवर वेळोवेळी तज्ज्ञ शास्त्रज्ञांकडून मार्गदर्शन दिले जात आहे.

या उपक्रमाचा एक भाग म्हणन बार्शीटाकळी तालुक्यातील जलालाबाद, वरखेड आणि वाघजई गावांमध्ये शेतकरी-शास्त्रज्ञ मंचाच्या सभा झाल्या. या सभांचे नेतृत्व तेलबिया संशोधन केंद्राचे प्रमुख डॉ. संतोष गहुकार यांनी केले.

नवनियुक्त संशोधन संचालक डॉ. श्यामसुंदर माने यांच्या मार्गदर्शनाखाली आयोजित या कार्यक्रमात पीक लागवड पूर्व तयारी, सोयाबीन लागवडीसाठी रुंद सरी वरंबा तंत्र, योग्य बीज निवड, बीज उगम तपासणी व बीज प्रक्रियेचे महत्त्व यावर सखोल चर्चा झाली.

या कार्यक्रमात डॉ. प्रशांत माने (तेलबिया संशोधन), डॉ. मनीष लाडोळे (कीटकशास्त्र), डॉ. मंजूषा गायकवाड (पीक पैदास), डॉ. भारत फरकाडे (वनस्पती रोगशास्त्र) यांच्यासह मंचाचे सदस्य निवृत्ती थोरात, नामदेव थोरात, शंकरराव ठाकरे, महादेव ठाकरे, विठ्ठल मुंढे, सुरेश शेंडे, राजेश शेंडे आदींसह परिसरातील शेतकरी सहभागी झाले.

उपक्रमाचा उद्देश

शेतकऱ्यांना वेळेवर व अचूक शेती सल्ला मिळवून देणे आणि शाश्‍वत व संपन्न शेतीची दिशा ठरवणे हा या शेतकरी-शास्त्रज्ञ मंचाचा मूळ उद्देश आहे. जमीन मशागत, माती व पाणी परीक्षण, पेरणीपूर्व मशागत, योग्य बियाण्यांची निवड, बीजप्रक्रिया, एकात्मिक अन्नद्रव्य व्यवस्थापन, कीड-रोग नियंत्रण, तसेच उत्पादन व विपणन यासह संपूर्ण शेती साखळीतील अडचणींवर चर्चेतून मार्ग काढला जात आहे.