Agriculture Scientist Visit : कृषी शास्त्रज्ञ पोहोचले शेतकऱ्यांच्या बांधावर

अॅग्रोवन वृत्तसेवा

Parbhani News : परभणी ः वसंतराव नाईक मराठवाडा कृषी विद्यापीठातर्फे प्रत्येक महिन्याच्या दुसऱ्या बुधवारी माझा एक दिवस माझ्या बळिराजासाठी हा उपक्रम राबविला जात आहे. बुधवारी (ता. १२) या उपक्रमात ११ चमूमधील ३४ शास्त्रज्ञांनी मराठवाड्यातील आठही जिल्ह्यांत जवळपास ४२५ शेतकऱ्यांच्या बांधावर जाऊन भेटी घेतल्या. रब्बी पिकांची काढणी, फळ पिकांचे कीड, रोग व्यवस्थापनासह इतर पिकांच्या व्यवस्थापनावर माहिती देत शेतकऱ्यांशी संवाद साधला.

विस्तार शिक्षण संचालनालयाद्वारे मानवत (जि. परभणी) येथे प्रगतिशील शेतकरी मोहन लाड यांच्या शेतावर कार्यक्रमाला शिक्षण संचालक डॉ. भगवान आसेवार, विस्तार शिक्षण संचालक डॉ. राकेश अहिरे, विभाग प्रमुख डॉ. राजेश कदम (विस्तार शिक्षण), डॉ. पुरुषोत्तम नेहरकर (कीटकशास्त्र विभाग), डॉ. रावसाहेब भाग्यवंत (कृषी अभियांत्रिकी विभाग), मुख्य विस्तार शिक्षण अधिकारी डॉ. प्रशांत देशमुख, कीटकशास्त्रज्ञ डॉ. अनंत लाड, मोहन लाड, बालाजी गोलाईत, प्रताप सोरेकर यांच्यासह अनेक प्रगतिशील शेतकरी उपस्थित होते.

या वेळी रेशीम संगोपन, संत्रा फळबाग व्यवस्थापन, दुग्ध व्यवसाय व्यवस्थापनावर माहिती देण्यात आली. तज्ज्ञांनी आधुनिक तंत्रज्ञान, कीड व रोग व्यवस्थापन, उत्पादन वाढीच्या दृष्टीने आवश्यक उपाययोजनांवर चर्चा केली. त्यानंतर बालाजी गोलाईत यांच्या पोल्ट्री फार्मला भेट देण्यात आली. पोल्ट्री व्यवस्थापन, खाद्य नियोजन आणि व्यावसायिक संधी याविषयी सखोल माहिती घेण्यात आली. मिरखेल (ता. परभणी) येथे संशोधन संचालक डॉ. खिजर बेग, ज्वार संशोधन केंद्राचे प्रभारी अधिकारी डॉ. एल. एन. जावळे यांची उपस्थिती होती.

छत्रपती संभाजीनगर येथील कृषी विभागाचे डॉ तुकाराम मोटे, माजी सहयोगी अधिष्ठाता डॉ. मोहन पाटील, सहयोगी संचालक डॉ. सूर्यकांत पवार, प्रभारी अधिकारी डॉ. शिवाजी शिंदे, सहयोगी प्राध्यापक डॉ. वीणा भालेराव, सहयोगी कृषी विद्यावेत्ता डॉ. अरविंद पांडागळे, प्रभारी अधिकारी डॉ. अनिल गोरे, विस्तार कृषिविद्यावेत्ता डॉ. वसंत सूर्यवंशी, प्रा. अरुण गुट्टे, डॉ. जी. डी. गडदे, शास्त्रज्ञ डॉ. बी. एम. कलालबंडी, डॉ. सी. व्ही. अंबाडकर, डॉ. डी. डी. पटाईत, डॉ. वर्षा मारवळीकर, डॉ. टी. बी. सुरपम, डॉ. बी. बी. गायकवाड, डॉ. अनिता जिंतूरकर, अशोक निर्वळ, नागेश सावंत यांचा सहभाग होता. सामुदायिक विज्ञान महाविद्यालय, कीटकशास्त्र विभाग, कृषी विस्तार शिक्षण विभाग, कृषी अभियांत्रिकी विभाग, छत्रपती संभाजीनगर येथील राष्ट्रीय कृषी संशोधन प्रकल्प, तुळजापूर, जि. धाराशिव, छत्रपती संभाजीनगर,

खामगाव (ता. गेवराई) येथील कृषी विज्ञान केंद्र, नांदेड येथील कापूस संशोधन केंद्र आणि केळी संशोधन केंद्र, परभणी येथील कृषी तंत्रज्ञान माहिती केंद्र, सेंद्रिय शेती संशोधन आणि प्रशिक्षण केंद्र, परभणी, अंबाजोगाई, लातूर, छत्रपती संभाजीनगर येथील विभागीय कृषी विस्तार शिक्षण केंद्रे, येथील या कार्यालयातील शास्त्रज्ञांनी त्यांच्या परिक्षेत्रातील शेतकऱ्यांना मार्गदर्शन करुन त्यांच्या प्रश्‍नाची उत्तरे दिली.